Gujarati News

ટોકયો, તા.૪: ઉત્તર કોરિયાના સર્વોચ્‍ચ નેતા કિમ જોંગ ઉન પડોશીઓ પ્રત્‍યે આક્રમક વલણ દાખવી રહ્યા છે. મંગળવારે સવારે ઉત્તર કોરિયાએ જાપાન ઉપર મિસાઈલ છોડી હતી. આ આક્રમક વલણ બાદ જાપાનમાં ચેતવણીના સાયરન વગાડવામાં આવ્‍યા હતા અને લોકોને સલામત સ્‍થળોએ છુપાઈ જવાની ચેતવણી આપવામાં આવી હતી. દેશના ઉત્તર ભાગમાં ટ્રેન વ્‍યવહાર પણ અસ્‍થાયી રૂપે સ્‍થગિત કરવામાં આવ્‍યો હતો. છેલ્લા ૧૦ દિવસમાં આ પાંચમી મિસાઈલ લોન્‍ચિંગ છે. દક્ષિણ કોરિયા અને અમેરિકાએ જાપાન સાથે મળીને સબમરીન વિરોધી કવાયત હાથ ધરી હતી, જેના વિરોધમાં ઉત્તર કોરિયા સતત મિસાઈલ છોડી રહ્યું છે.
આ મિસાઈલ પ્રશાંત મહાસાગરમાં પડતા પહેલા જાપાનની ઉપરથી પસાર થઈ હતી, જેનાથી જાપાનમાં ચેતવણી આપવામાં આવી હતી. આ ઘટનાનો એક વીડિયો પણ સામે આવ્‍યો છે, જેમાં સાયરન સંભળાય છે. સાયરનના અવાજ સાથે ચેતવણી આપવામાં આવી રહી છે. તે સ્‍પષ્ટ જોઈ શકાય છે કે શેરીઓમાં મૌન છે. આ મિસાઈલને નષ્ટ કરવા માટે જાપાને કોઈપણ પ્રકારનો સંરક્ષણ ઉપાય અપનાવ્‍યો નથી. જાપાનના વડાપ્રધાન ફયુમિયો કિશિદાએ ઉત્તર કોરિયાના મિસાઈલ પ્રક્ષેપણની નિંદા કરી છે.
મિસાઈલ પ્રક્ષેપણ પછી તરત જ વડાપ્રધાન કિશિદાએ કહ્યું, એક બેલેસ્‍ટિક મિસાઈલ આપણા દેશની ઉપરથી પસાર થઈને પેસિફિક મહાસાગરમાં પડી હોવાનું માનવામાં આવે છે. બેલેસ્‍ટિક મિસાઈલના વારંવાર પ્રક્ષેપણ પછી તે હિંસાનું કળત્‍ય છે. અમે આની સખત નિંદા કરીએ છીએ. જાપાનના ટોચના પ્રવક્‍તા હિરોકાઝુએ મંગળવારે વહેલી સવારે એક સંક્ષિપ્ત ન્‍યૂઝ કોન્‍ફરન્‍સ યોજી હતી, જેમાં ઉત્તર કોરિયાની મિસાઇલોને શાંતિ અને સુરક્ષા માટે ખતરો ગણાવી હતી.
જ્‍યારે ઉત્તર કોરિયાની મિસાઈલ જાપાનની હવાઈ ક્ષેત્રમાંથી પસાર થઈ ત્‍યારે સાયરન વાગ્‍યું. જાપાની સરકારે લોકોને સ્‍થાનિક સમય મુજબ સવારે ૭.૨૯ વાગ્‍યે ઇમારતો અને ભૂગર્ભ આશ્રયસ્‍થાનોમાં જવા કહ્યું. રાત્રે ૮ વાગ્‍યે વડાપ્રધાન કાર્યાલય દ્વારા ટ્‍વિટ કરવામાં આવ્‍યું કે ઉત્તર કોરિયાની મિસાઈલ જાપાનની ઉપરથી પસાર થઈ શકે છે. જાપાનના કોસ્‍ટ ગાર્ડના એક નિવેદનમાં કહેવામાં આવ્‍યું છે કે મિસાઈલ સમુદ્રમાં પડી હોવાનું જણાય છે. તે કોઈ જહાજ અથવા વસ્‍તુ સાથે અથડાયા હોવાના અહેવાલ નથી.
જાપાનના ટેલિવિઝન અસાહીએ સૂત્રોને ટાંકીને જણાવ્‍યું હતું કે ઉત્તર કોરિયાએ કદાચ ઇન્‍ટરકોન્‍ટિનેન્‍ટલ બેલેસ્‍ટિક મિસાઇલ છોડી છે. આ મિસાઈલ જાપાનથી લગભગ ૩,૦૦૦ કિમી દૂર છે.
જાપાની બ્રોડકાસ્‍ટર NHK એ અહેવાલ આપ્‍યો કે પરીક્ષણને કારણે પૂર્વ જાપાન રેલ્‍વે કંપનીએ ઉત્તરીય પ્રદેશોમાં તેની ટ્રેન કામગીરી સ્‍થગિત કરી દીધી.