Gujarati News

નવી દિલ્હી,તા. ૫ : જયારે તમે રાંધતી વખતે મીઠું નાખો છો તો શકય છે કે તમે તમારા શાકમાં પ્લાસ્ટિક છાંટી રહ્યા છો. શકય છે કે તમે કોઈ પ્લાસ્ટિકની થેલી, કપ અથવા કટલરીના અત્યંત સૂક્ષ્મ ભાગને શાકમાં નાખીને પીરસી રહ્યા છો. કારણકે સંશોધકોએ મીઠામાં માઈક્રોપ્લાસ્ટિકની શોધ કરી છે. આપણે સૌ જાણીએ છે કે મીઠાનો સર્વવ્યાપી ઉપયોગ થાય છે.

તાજેતરમાં જ ગોવાના નેશનલ સેન્ટર ફોર પોલર એન્ડ ઓશન રિસર્ચ સહિત તમિલનાડુની ત્રણ યુનિવર્સિટી દ્વારા ગુજરાત અને તમિલનાડુના મીઠાના નમૂના લેવામાં આવ્યા હતા. ઉલ્લેખનીય છે કે બન્ને રાજયોમાં મોટા પ્રમાણમાં મીઠાનું ઉત્પાદન થાય છે. માઈક્રોપ્લાસ્ટિક નાના નાના કણો હોય છે, જે ૧૦૦-૨૦૦ માઈક્રોમીટર્સ જેટલા હોય છે. સિંગલ-યુઝ અથવા સામાન્ય પ્લાસ્ટિકની વસ્તુઓમાંથી નીકળી આવે છે. આ વસ્તુઓમાં પેકેજિંગ મટિરિયલ, કટલરી, પોલિએસ્ટર ટેકસટાઈલ, માછીમારી માટે વપરાતી જાળી, કોસ્મેટિક વગેરેનો સમાવેશ થાય છે.

ગુજરાતમાંથી લેવામાં આવેલા મીઠાના નમૂનામાંથી પ્રતિ ૨૦૦ ગ્રામ ૪૬થી ૧૧૫ પાર્ટિકલ્સ મળી આવ્યા છે. તમિલનાડુની વાત કરીએ તો અહીંથી પ્રતિ ૨૦૦ ગ્રામ ૨૩-૧૦૧ પાર્ટિકલ્સ મળી આવ્યા છે. હજી આ સંશોધન પર કામ ચાલી રહ્યું છે. મીઠામાં મળી આવેલ સૌથી સામાન્ય માઈક્રોપ્લાસ્ટિક પોલિએસ્ટર, પોલિવિનીલ કલોરાઈડ હોય છે. તમિલનાડુની પેરિયાર યુનિવર્સિટીના જીઓલોજી ડિપાર્ટમેન્ટના પ્રોફેસર એ. વિદ્યાશંકર જણાવે છે કે, શકય છે કે મીઠાનું ઉત્પાદન કરતી કંપનીઓના પ્રોસેસિંગ અને પેકેજીંગ યુનિટ્સ આ માઈક્રોપ્લાસ્ટિક ફાઈબરના સ્ત્રોત હોય.

પ્રોફેસર વિદ્યાશંકરના જણાવ્યા અનુસાર, અભ્યાસમાં મળી આવેલ કુલ માઈક્રોપ્લાસ્ટિના ૭૪.૩ ટકા લાલ અને વાદળી રંગના રેસાદાર મટિરિયલના હતા. અમે ઈચ્છીએ છીએ કે આ રાજયો માઈક્રોપ્લાસ્ટિકની સમસ્યાને સ્વીકારે અને તેમની પ્રક્રિયામાં સુધારો લાવે. તમિલનાડુની મલનકારા કેથલિક કોલેજના જીઓલોજી ડિપાર્ટમેન્ટના પ્રોફેસર એસ. ક્રિષ્ના કુમાર જણાવે છે કે, ગુજરાત અને તમિલનાડુના મીઠાના નમૂનાઓમાં જે કણો મળી આવ્યા છે તેની પ્રાથમિક તપાસ અમારી ટીમ દ્વારા કરવામાં આવી છે. આપણા શરીર પર તેની શું અસર થાય છે તે હવે શોધવાનું છે. તેના સંપૂર્ણ પરિણામો જાણવામાં કદાચ દશકા જેટલો સમય લાગી જાય. પરંતુ સૌપ્રથમ તો આપણે તેની હાજરીને સ્વીકારવાની જરુર છે.