Gujarati News

નવી દિલ્હી, તા.૫: કન્નડ ફિલ્મોની જાણીતી એકટ્રેસ રાગિની દ્વિવેદીની ધરપકડ કરવામાં આવી છે. રાગિનીના બેંગલુરુ સ્થિત દ્યરે આજે ક્રાઈમ બ્રાંચે દરોડ પાડ્યા હતા. ક્રાઈમ બ્રાંચની ટીમ ડ્રગ્સની સપ્લાય,ઉપયોગ અને ખરીદ-વેચાણ મામલે રાગિનીની પૂછપરછ કરી રહી છે. અન્ય એક આરોપી વિરેન ખન્નાની પણ ધરપકડ કરવામાં આવી છે.

વિરેનની દિલ્હીથી ધરપકડ કરવમાં આવી હતી. વિરેન મોટી-મોટી પાર્ટીઓનું આયોજન કરતો હતો જેમાં ડ્રગ્સનો ઉપયોગ કરવામાં આવતો હતો. આરોપીઓને ૪ દિવસની કસ્ટડીમાં મોકલવામાં આવ્યા છે.  ડ્રગ્સ મામલે રાગિની સહિત અત્યાર સુધી કુલ ચાર લોકોની ધરપકડ કરવામાં આવી છે.

ડ્રગ્સના ગેરકાયદે વેપાર મામલે એક સરકારી કર્મચારી અને એક રિયલ એસ્ટેટ વેપારીની ધરપકડ બાદ રાગિનીનું નામ સામે આવ્યું હતું. પોલીસે જણાવ્યું હતું કે, વિદેશ મૂળનો એક નાગરિક આ લોકોને ડ્રગ્સ સપ્લાય કરતો હતો, જેની ઓળખ કરવામાં આવી છે. જો કે હજુ સુધી તેની ધરપકડ કરવામાં આવી નથી.