Gujarati News

Gujarati News

News of Wednesday, 6th July 2022

યુવકે ડિલિવરી બોય બનીને પેસ્ટ્રીની સાથે રિઝ્યુમ મોકલ્યો

નોકરી માટે અનોખો રસ્તો અપનાવતો યુવક : યુવકે મેસેજમાં લખ્યું કે, મોટાભાગના રિઝ્યુમ કચરાના ડબ્બામાં પહોંચે છે, પણ મારો રિઝ્યુમ તમારા પેટમાં જશે

બેંગ્લોર, તા.૬ : નોકરી શોધવા માટે લોકો વિવિધ પોર્ટલની મદદ લેતા હોય છે, રેફરન્સ શોધતા હોય છે, તૈયારી સાથે ઈન્ટર્વ્યુમાં જતા હોય છે. આ બધું તો તમે સાંભળ્યુ હશે, પરંતુ અહીં એક ૨૪ વર્ષીય યુવકની વાત છે જેણે કામ મેળવવા માટે અનોખો રસ્તો અપનાવ્યો છે. તેણે એક ઝોમેટો ડિલિવરી બોયનો યૂનિફોર્મ પહેર્યો અને બેંગ્લોરની જે કંપનીઓમાં કામ કરવા માંગતો હતો તેના દરવાજા પર પેસ્ટ્રીની સાથે સાથે પોતાનો રિઝ્યુમ મોકલ્યો. તેણે આની સાથે એક રસપ્રદ મેસેજ પણ મૂક્યો હતો. યુવકે લખ્યું કે, મોટાભાગના રિઝ્યુમ કચરાના ડબ્બામાં પહોંચે છે, પણ મારો તમારા પેટમાં જશે.

આ અનોખી પદ્ધતિ અપનાવનાર યુવકનું નામ છે અમન ખંડેલવાલ. અમન રાજસ્થાનના જયપુર શહેરનો રહેવાસી છે અને તેણે આ જ વર્ષે પુનાની એક કોલેજથી ફાઈનાન્સમાં એમબીએનો અભ્યાસ કર્યો છે. તેણે નામચીન કંપનીઓમાં ઈન્ટર્નશીપ મેળવવા માટે ઘણો સંઘર્ષ કર્યો. આખરે તેણે કંઈક રચનાત્મક કરવાનો નિર્ણય લીધો. સાન ફ્રાન્સિસ્કોના માર્કેટિંગ સ્પેશિયાલિસ્ટ લ્યુકાસ યેલાથી પ્રેરિત થયો. ઉલ્લેખનીય છે કે તેમણે રિઝ્યુમની સાથે સાથે ડોનટ્સ મોકલ્યા હતા.

અમન જણાવે છે કે, મેં બેંગ્લોરમાં આ પદ્ધતિ અજમાવી જોવાનો નિર્ણય લીધો. અહીંની અમુક કંપનીઓમાં હું કામ કરવા માંગતો હતો. આ શહેર આ પ્રકારની રચનાત્મકતાને સ્વીકારવા અને પ્રોત્સાહન આપવા માટે ઓળખાય છે. મેં એક લાલ રંગની ટી-શર્ટ ખરીદી અને ફૂડ ડિલિવરી પ્લેટફોર્મનું નામ તેના પર પ્રિન્ટ કરાવ્યું. અમન પોતાના અનુભવ વિશે આગળ જણાવે છે કે, આ આખી પ્રક્રિયામાં મને ૪૦૦ રુપિયા ખર્ચ થયો. હું જે કંપનીમાં રિઝ્યુમ મોકલવા માંગતો હતો ત્યાં પહોંચ્યો અને સિક્યોરિટી ગાર્ડના હાથમાં પાઈનેપલ પેસ્ટ્રીનું બોક્સ આપ્યું.

અમને પેસ્ટ્રીની સાથે મેસેજ મૂક્યો અને તેની પાછળ રિઝ્યુમ હતું. કંપનીના હ્યુમન રિસોર્સ મેનેજર્સ સુધી આ બોક્સ પહોંચાડ્યા હતા. અમને સોશિયલ મીડિયા પર પણ પોતાના આ જુગાડ વિશે જાણકારી શેર કરી હતી. ઉલ્લેખનીય છે કે અમને જેનાથી પ્રેરિત થઈને આ ઉપાય અપનાવ્યો હતો તેમને ૧૦ ઈન્ટર્વ્યુ કોલ આવ્યા હતા, જો તેને હજી સુધી એક પણ કોલ નથી આવ્યો. પરંતુ સોશિયલ મીડિયા પર પોસ્ટ કર્યાના બે દિવસમાં તેને ૬-૭ ઈન્ટર્વ્યુ કોલ પ્રોડક્ટ મેનેજરની પોસ્ટ માટે આવ્યા હતા.

અમન જણાવે છે કે, શરુઆતમાં હું ખચકાતો હતો કે લોકો કેવી પ્રતિક્રિયા આપશે. પરંતુ મારી પોસ્ટ વાયરલ થઈ ગઈ. મિત્રો અને પરિવારના લોકો પણ મારો સંપર્ક કરી રહ્યા છે. હું લોકોની ઓફિસો અને ઘરોમાં ચર્ચાનો એક વિષય બની ગયો છું.

(8:09 pm IST)