Gujarati News

મોસ્કો, તા.૬ : રશિયાએ યુક્રેન પર આક્રમણ કર્યું ત્યારે ધડાધડ વધી રહેલા ક્રૂડ ઓઈલના ભાવમાં નરમાઈ આવવા લાગી છે. એક તબક્કે ૧૩૦ ડોલર પ્રતિ બેરલને પાર કરી ગયેલા ક્રૂડનો ભાવ હવે ૧૦૦ ડોલરથી નીચે સરક્યો છે. આજે વેસ્ટ ટેક્સાસ ઈન્ટરમિડિયેટ (ડબલ્યુટીઆઈ) ક્રૂડ ફ્યુચર્સ ૯.૩ ટકા તૂટીને ૯૮ ડોલર થયો હતો. આગામી વર્ષે મંદી આવી શકે છે તેવી અટકળો વચ્ચે ક્રૂડના ભાવ ઘટ્યા છે. તે દર્શાવે છે કે ડિમાન્ડમાં નરમાઈ આવી છે. મે મહિના પછી ઓઈલ ફ્યુચર્સ પહેલી વખત ૧૦૦ ડોલરથી નીચે ગયું છે. મંગળવારે ડોલરનો ભાવ વધ્યો હતો અને ઓઈલના ભાવ પર પ્રેશર હતું. સિટીગ્રૂપે જણાવ્યું કે મંદીના કારણે ચાલુ વર્ષમાં ક્રૂડ ઓઈલનો ભાવ ઘટીને ૬૫ ડોલર થઈ શકે છે. જેપી મોર્ગનના અંદાજ કરતા આ ગણતરી સાવ અલગ છે. જેપી મોર્ગન ચેઝે ક્રૂડનો ભાવ ૩૮૦ ડોલર થવાની આગાહી કરી હતી.

સિટી ઇન્ડેક્સ ખાતે માર્કેટ એનાલિસ્ટ ફવાદ રઝાકઝાદાએ જણાવ્યું કે ક્રૂડના સપ્લાયની ચિંતા સામે ડિમાન્ડ ઘટવાના સંકેત દેખાય છે જેના કારણે ક્રૂડ ઓઈલના ભાવમાં ઘટાડો આવ્યો છે. વધુને વધુ એનાલિસ્ટ્સ માને છે કે આગામી કેટલાક મહિનામાં અમેરિકા જેવા અર્થતંત્રમાં નેગેટિવ ગ્રોથ જોવા મળશે અને અંતે મંદીનું આગમન થશે.

બીજી તરફ ચીનમાં પણ કોવિડની સ્થિતિ અંકુશમાં નથી આવી. શાંઘાઈના નવ ડિસ્ટ્રીક્ટમાં કોવિડના માસ ટેસ્ટિંગની શરૃઆત થઈ છે. વિશ્વમાં સૌથી વધારે ઓઈલની ખપત ધરાવતા દેશોમાં ચીન સામેલ છે અને ત્યાં ડિમાન્ડમાં રિકવરી આવશે કે નહીં તે વિશે સવાલો છે. રવિવારે અને સોમવારે કોવિડના કેસ વધવાના કારણે ચીને કેટલાક શહેરોમાં લોકડાઉન લાદવાનો નિર્ણય લીધો છે. ક્રૂડ ઓઈલના ભાવ પર અસર કરતા બીજા પરિબળો પણ છે લિબિયામાં તાજેતરમાં ઓઈલનો સપ્લાય ખોરવાયો છે. નોર્વેમાં ઓફશોર વર્કર્સે હડતાલ પાડી છે જેના કારણે ઓઈલ અને ગેસના સપ્લાયને અસર થઈ છે. આ સ્ટ્રાઈકથી ઓઈલ અને ગેસના આઉટપુટમાં ૮૯૦૦૦ બેરલનો દૈનિક ઘટાડો થવાની શક્યતા છે. વિશ્વમાં સૌથી વધારે ઓઈલની નિકાસ કરતા સાઉદી અરેબિયાએ ઓગસ્ટ માટે ક્રૂડ ઓઈલના ભાવ વધાર્યા છે. પરંતુ એકંદરે અમેરિકન બજારની ચિંતા છે જ્યાં આગામી વર્ષમાં મંદી છવાઈ જાય તેવી શક્યતા છે.