Gujarati News

નવી દિલ્હી તા. ૮ : ભારતમાં કોરોનાનીબીજી લહેર હાહાકાર મચાવી રહી છે. દરરોજ કોરોના વાયરસના નવા કેસો નોંધાઈ રહ્યા છે અને કેસની સંખ્યા ૪ લાખને વટાવી ગઈ છે. જો કે, કોરોના વચ્ચે દેશના કેટલાક જિલ્લાઓ માટે પણ રાહતના સમાચાર છે.કારણ કે છેલ્લા કેટલાક સમયમાં કોરોનામાં એક પણ કેસ નોંધાયો નથી. કેન્દ્રીય આરોગ્ય મંત્રાલયના આંકડા જોઈએ તો દેશમાં ૧૮૦ જિલ્લાઓ એવા છે જયાં છેલ્લા સાત દિવસોમાં કોરોના નો એક પણ કેસ નોંધાયો નથી.

કેન્દ્રીય આરોગ્ય પ્રધાન હર્ષ વર્ધનએ કહ્યું કે છેલ્લા ૭ દિવસથી દેશના ૧૮૦ જિલ્લાઓમાં કોરોનાનો એક પણ નવો કેસ જોવા મળ્યો નથી. તે જ સમયે, છેલ્લા ૧૪ દિવસમાં ૧૮ જિલ્લાઓમાં કોઈ કેસ નોંધાયા નથી. આ ઉપરાંત છેલ્લા ૨૧ દિવસમાં ૫૪ જિલ્લાઓમાં કોઈ નવા કેસ જોવા મળ્યા નથી. ઉલ્લેખનીય છે કે આજે પણ દેશભરમાં કોરોના વાયરસના ૪ લાખથી વધુ નવા કેસ નોંધાયા છે અને આ સમયગાળા દરમિયાન ચાર હજારથી વધુ લોકોનાં મોત નીપજયાં છે.

તે જ સમયે, રસી અંગે, આરોગ્ય મંત્રાલયે કહ્યું કે ભારત સરકારે અત્યાર સુધીમાં રાજયો અને કેન્દ્રશાસિત પ્રદેશોમાં ૧૭.૪૯ કરોડથી વધુ રસી ડોઝ આપ્યા છે રાજય અને કેન્દ્રશાસિત પ્રદેશોમાં હજી પણ ૮૪ લાખથી વધુ ડોઝ ઉપલબ્ધ છે. મંત્રાલયે કહ્યું કે, આગામી ૩ દિવસની અંદર, ૫૩ લાખથી વધુ રસી ડોઝ રાજયો -કેન્દ્રશાસિત પ્રદેશોમાં પહોંચશે.

કેન્દ્રીય આરોગ્ય મંત્રાલયના આંકડા મુજબ સવારે આઠ વાગ્યા સુધી ૩૭,૨૩,૪૪૬ દર્દીઓ સારવાર હેઠળ છે જે કુલ કેસોના૧૭.૦૧ ટકા છે મળતી માહિતી પ્રમાણે સ્વસ્થ થનારા લોકોની સંખ્યા ૧,૭૯,૩૦,૯૬૦ થઈ ગઈ છે જયારે મૃત્યુ દર ૧.૦૯ ટકા નોંધાયુ છે.