Gujarati News

ઉત્તરપ્રદેશના લખીમપુર ખીરી કાન્ડમાં ચાર ખેડૂતો સહિત આઠ લોકોની હત્યા બાબતે સુપ્રીમ કોર્ટે આજે યુપી સરકારની કાર્યવાહીથી સખત નારાજગી દર્શાવી છે અને કહ્યું છે કે ઉત્તર પ્રદેશ સરકારના પગલાઓથી જરા પણ  સંતુષ્ટ નથી. લખીમપુર ખીરી હિંસા  મામલામાં જે આરોપીઓ વિરુદ્ધ એફઆઈઆર દાખલ થઇ છે તેમની ધરપકડ નહીં કરવા બાબતે સુપ્રીમ કોર્ટે યોગી સરકારને સવાલ પૂછ્યો હતો કે આખરે તમે શું સંદેશ આપવા માગો છો? 

ઉત્તર પ્રદેશની યોગી સરકાર તરફથી સુપ્રીમ કોર્ટમાં કેસ લડી રહેલા ધારાશાસ્ત્રી હરીશ સાલ્વેએ અદાલતને  કહ્યું હતું કે આરોપી આશિષ મિશ્રા આવતીકાલે સવારે ૧૧ વાગે ક્રાઇમ બ્રાન્ચ સમક્ષ હાજર થશે. એ પહેલા સુપ્રીમ કોર્ટે ઉત્તરપ્રદેશની સરકારે ગઈકાલે ગુરુવારે, શુક્રવાર સુધીમાં સ્ટેટસ રિપોર્ટ રજૂ કરવા કહ્યું હતું. 

ચીફ જસ્ટિસ ઓફ ઇન્ડિયાએ ઉત્તરપ્રદેશ સરકારને કહ્યું હતું કે જ્યાં સુધી કોઈ બીજી એજન્સી આ બનાવ સંભાળે નહીં ત્યાં સુધી કેસના પુરાવા સુરક્ષિત રાખવામાં આવે. કેસના પુરાવાનો નાશ ન થાય તે જોવા પણ કહ્યું છે.