Gujarati News

Gujarati News

News of Thursday, 9th June 2022

દર્દનાક સજા : દીકરીએ લેસન ન કર્યું : માતાએ ધગધગતા તડકામાં હાથ-પગ બાંધી ધાબે છોડી દીધી

પોલીસે કહ્યું કે, છોકરીના પરિવારની ઓળખ થઇ ગઇ છે અને તેમની સામે યોગ્‍ય કાર્યવાહી પણ કરવામાં આવશે

નવી દિલ્‍હી તા. ૯ : સોશિયલ મીડિયા પર એક વીડિયો વાઈરલ થયો છે, જેમાં દિલ્‍હીમાં ૫ વર્ષની એક છોકરી ધગ-ધગતા તડકામાં ટેરેસ પર હાથ પાછળથી બાંધેલી હાલતમાં સૂઈ રહી છે. આ વીડિયો સામે આવ્‍યા બાદ લોકોએ જવાબદારો સામે કાર્યવાહી કરવાની માંગ કરી છે. પોલીસે જણાવ્‍યું કે, પ્રાથમિક તપાસમાં જાણવા મળ્‍યું છે કે, આ ઘટના ૨ જૂન શહેરના ખજુરી ખાસ વિસ્‍તારમાં બની હતી. દિલ્‍હી પોલીસે બાળકી સાથે માતાના દુર્વ્‍યવહાર પર JJ એક્‍ટ હેઠળ કેસ નોંધ્‍યો છે.

તેમણે કહ્યું કે, છોકરી હોમવર્ક કરી રહી ન હતી, તેથી તેની માતાએ તેના હાથ-પગ બાંધી દીધા અને તેને ટેરેસ પર છોડી દીધી. દિલ્‍હી પોલીસે કહ્યું કે, છોકરીના પરિવારની ઓળખ થઈ ગઈ છે અને તેમની સામે યોગ્‍ય કાર્યવાહી પણ કરવામાં આવશે.

દિલ્‍હી પોલીસે ટ્‍વિટ કર્યું કે, ‘સોશિયલ મીડિયા પર વીડિયો વાયરલ થયા બાદ, દિલ્‍હી પોલીસે તેની ઓળખ અને સંજોગો જાણવા માટે તમામ પ્રયાસો કર્યા. છોકરીના પરિવારની ઓળખ કરી લેવામાં આવી છે અને યોગ્‍ય કાર્યવાહી શરૂ કરવામાં આવી છે. પાડોશીના ઘરમાંથી શૂટ કરવામાં આવેલા વીડિયોમાં છોકરી મદદ માટે ચીસો પાડતી સાંભળી શકાય છે. તે પણ પોતાની જાતને ખોલવાનો પ્રયાસ કરતી જોવા મળી રહી છે.'

૨૫ સેકન્‍ડનો વીડિયો બનાવનારી મહિલાએ દાવો કર્યો હતો કે, બાળકીની માતાએ તેના હાથ-પગ બાંધી દીધા હતા અને તેને ધાબા પર લગભગ ૨ વાગ્‍યે તડકામાં છોડી દીધી હતી. પોલીસે ખજુરી ખાસ વિસ્‍તારમાં આવેલી ઈમારતની ઓળખ કરી અને યુવતીના પરિવારને શોધી કાઢ્‍યો. પૂછપરછ હાથ ધરવામાં આવી છે અને પરિવાર સામે કાયદેસરની કાર્યવાહી કરવામાં આવશે. એક વરિષ્ઠ પોલીસ અધિકારીએ આ માહિતી આપી.

આ દરમિયાન સોશિયલ મીડિયા યુઝર્સે આ ઘટના પર આક્રોશ વ્‍યક્‍ત કર્યો હતો અને જવાબદારો સામે પગલાં લેવાની માંગ કરી હતી. એક યુઝર્સ રાહુલ સિંહે લખ્‍યું, આ ભયાનક છે. મહેરબાની કરીને તરત જ આના પર ધ્‍યાન આપો. આનંદ વર્મા નામના એક યુઝરે લખ્‍યું, ‘કૃપા કરીને તરત જ આ બાબત પર ધ્‍યાન આપો.'

(10:23 am IST)