Gujarati News

નવી દિલ્હી, તા. ૧૦ : અમેરિકાએ H-1B વિઝાની સિલેક્શન પ્રોસેસમાં ફેરફાર કર્યો છે. અમેરિકન સિટિઝનશિપ અને ઇમિગ્રેશન સર્વિસીઝએ H-1B વિઝા સિલેક્શનમાં સેલરી અને સ્કિલને પ્રાથમિકતા આપી છે. એનાથી અમેરિકન નાગરિકોનાં હિતની રક્ષા થઈ શકશે. અગાઉ આ વિઝાનું સિલેક્શન લોટરી પ્રોસેસથી થતું હતું. નિયમોમાં પરિવર્તન પછી અસ્થાયી રોજગાર પ્રોગ્રામથી હાઈ સ્કિલવાળા વિદેશી પ્રોફેશનલ્સને વધુ લાભ થશે. H-1B વિઝાની સિલેક્શન પ્રોસેસને નવા નિયમો સાથે ફેડરલ રજિસ્ટરમાં પબ્લિશ કરી દેવામાં આવી છે. આ નવા નિયમો ૬૦ દિવસમાં લાગુ થઈ જશે. USCISના ડેપ્યુટી ડાયરેક્ટર ફોર પોલિસી જોસેફ એડલોએ કહ્યું હતું કે H-1B કામચલાઉ વિઝા પ્રોગ્રામનો એમ્પ્લોયર દુરુપયોગ કરી રહ્યા છે. તેઓ એનો ઉપયોગ મુખ્યત્વે પ્રાથમિક કક્ષાની પોસ્ટ્સ ભરવા અને તેમનો વ્યાવસાયિક ખર્ચ ઘટાડવા માટે કરી રહ્યા છે.

H-1B એ નોન-ઇમિગ્રન્ટ વિઝા હોય છે, જે હેઠળ અમેરિકન કંપનીઓને વિશિષ્ટ ટેક્નિકલ કુશળતા ધરાવતી પોસ્ટ પર વિદેશી વ્યાવસાયિકોની નિમણૂક કરવાની મંજૂરી હોય છે. આ વિઝા દ્વારા ટેકનોલોજી સેક્ટરની કંપનીઓ ભારત અને ચીન જેવા દેશોમાંથી દર વર્ષે હજારો કર્મચારીઓની ભરતી કરે છે. અમેરિકન કોંગ્રેસના નિયમો અનુસાર, એક વર્ષમાં ૮૫,૦૦૦ H-1B વિઝા ઇસ્યુ કરવામાં આવે છે, જેમાંથી ૬૫ હજાર સ્પેશિયલ ઓક્યુપેશનના લોકોને અપાય છે, જ્યારે બાકીના ૨૦ હજાર વિઝા અમેરિકન યુનિવર્સિટીમાંથી માસ્ટર્સ કે અન્ય સમકક્ષ હાયર ડીગ્રી મેળવતા વિદેશી વર્કર્સને આપવામાં આવે છે.

અત્યારસુધીમાં H-1B વર્ક વિઝાની પ્રક્રિયા રેન્ડમાઇઝ લોટરી સિસ્ટમ દ્વારા થતી હતી. એમાં પગાર, અનુભવ કે અન્ય જરૂરિયાતોનો સમાવેશ નહોતો થતો. આ વિઝાનો સૌથી વધુ લાભ ભારતીય કંપનીઓ તથા ભારતીય પ્રોફેશનલ્સ લેતા હતા. નવો નિયમ ફેડરલ રજિસ્ટરમાં પ્રકાશિત થયાના ૬૦ દિવસ પછી અમલમાં આવશે. H-1B વિઝા પ્રોગ્રામ માટે અરજી કરવાનો આગામી તબક્કો ૧ એપ્રિલ, ૨૦૨૧થી શરૂ થશે. નવો નિયમ ફક્ત H-1B વિઝાના રજિસ્ટ્રેશન પર જ લાગુ થશે. જો રજિસ્ટ્રેશન કેન્સલ થઈ ગયું તો જે લોકોએ H-1B કેપ હેઠળ અરજી કરી છે તેમની ફાઇલિંગમાં જ આ અરજી લાગુ કરવામાં આવશે.

અમેરિકન સિટિઝનશિપ અને ઇમિગ્રેશન સર્વિસીઝે જણાવ્યું હતું કે નવા નિયમો H-1B રેગ્યુલર કેપ અને ઁ-૧મ્ એડવાન્સ્ડ ડીગ્રી એક્સેમ્પ્શન બંનેને લાગુ પડશે. આ બંનેમાં સિલેક્શનના ક્રમમાં કોઈ ફેરફાર થશે નહીં.

ગયા વર્ષે ૧ એપ્રિલ, ૨૦૨૦ના રોજ USCISને H-1B વર્ક વિઝા માટેની અઢી લાખ અરજી મળી હતી. એમાં ૬૭ ટકા એટલે કે ૧.૮૪ લાખ અરજીઓ ભારતીયોએ કરેલી હતી. અમેરિકાના પ્રમુખ તરીકે સત્તા સંભાળતાંની સાથે જ ડોનાલ્ડ ટ્રમ્પે વર્ક વિઝાના નિયમોમાં ધરમૂળથી પરિવર્તન લાવવાના સંકેત આપ્યા હતા. ગયા વર્ષના નવેમ્બરમાં અમેરિકન હાઉસ જ્યુડિશિયરીએ ભારતીય અને ચાઇનીઝ કંપનીઓને હાંસિયામાં ધકેલવા માટે H-1B વિઝાધારકો માટેની મિનિમમ સેલરી ૬૦ હજાર ડૉલરથી વધારીને ૯૦ હજાર ડૉલર કરી નાખવા માટેનું લેજિસ્લેશન પાસ કર્યું હતું.

પોતાને સતત ભારતના અને વડાપ્રધાન મોદીના મિત્ર ગણાવતા રહેલા ડોનાલ્ડ ટ્રમ્પ 'અમેરિકા ફર્સ્ટલ્લના નામે સતત એવા નિર્ણયો લેતા રહ્યા છે, જેનાથી ભારતીય ઇમિગ્રન્ટ્સને નુકસાન થાય. પોતાની વિદાયના માંડ એક પખવાડિયા પહેલાં લેવાયેલો આ નિર્ણય છેલ્લા એક વર્ષમાં તેમણે લીધેલો આવો ચોથો મોટો નિર્ણય છે. ગયા વર્ષે તેમણે H-1B સહિત તમામ ઇમિગ્રન્ટ અને નોન-ઇમિગ્રન્ટ વર્ક વિઝાની અપ્રૂવલ પર ૬૦ દિવસનો પ્રતિબંધ લગાવી દીધો હતો. જૂન, ૨૦૨૦માં તેમણે આ પ્રતિબંધ છેક ૨૦૨૦ના અંત સુધી લંબાવી દીધો હતો.

૫ ઑગસ્ટ, ૨૦૨૦ના રોજ ટ્રમ્પે એક એક્ઝિક્યુટિવ ઑર્ડર પાસ કર્યો હતો કે હવેથી કોઈપણ ફેડરલ એજન્સી અમેરિકન નાગરિકો કે ગ્રીન કાર્ડધારકોને બદલે H-1B વિઝાધારકો તથા અન્ય વિદેશી કામદારોને નોકરીએ રાખી નહીં શકે. જોકે એના એક અઠવાડિયામાં જ તેમણે આ નિયમમાં થોડો ફેરફાર કરીને અમુક H-1B વિઝાધારકોને પોતાના અમેરિકન એમ્પ્લોયરને ત્યાં કામ કરવા આવવાની મંજૂરી આપી હતી. ઑક્ટોબરમાં DHSએ અત્યારના ફેરફારને ફાઇનલ મંજૂરી આપતો વચગાળાનો હુકમ બહાર પાડેલો, જે હવે ૮ જાન્યુઆરીના રોજ પબ્લિશ થયો છે.

ટ્રમ્પ સરકાર દ્વારા સતત H-1B વિઝાના નિયમોમાં ફેરફાર કરીને તેને વધુ ને વધુ આકરા બનાવતા જવાની નીતિનો અમેરિકાની ગંજાવર ટેક્નોલોજી કંપનીઓ સતત વિરોધ કરી રહી છે. એમાં ગૂગલ, ફેસબુક, ટ્વિટર, માઇક્રોસોફ્ટ જેવા ટેક જાયન્ટ્સ પણ સામેલ છે. અલબત્ત, સમયાંતરે ભારતીય કંપનીઓએ અમેરિકાની વર્ક પરમિટ્સ પરનું અવલંબન ઘટાડ્યું છે, એમ છતાં હજી ઘણે અંશે ટેક્નોલોજીના ક્ષેત્રમાં તો ભારતીય બ્રેનને રાખ્યા વિના આ કંપનીઓને છૂટકો નથી.

H-1B વિઝા સામાન્ય રીતે ત્રણ વર્ષ માટે અપાતા હોય છે. એને અંતે વિઝાધારક કંપનીઓ બદલીને અમેરિકાની જ અન્ય કોઈ કંપનીમાં કામ કરવાનું ચાલુ રાખતા હોય છે. ૨૦૧૮-૧૯ના વર્ષમાં ગૂગલ, ફેસબુક અને એપલે ૧૩ હજારથી પણ વધુ હાઈલી સ્કિલ્ડ IT કર્મચારીઓને H-1B વર્ક વિઝા અપાવીને પોતાને ત્યાં નોકરીએ રાખ્યા હતા. તેમાં નવા વિઝા ઉપરાંત પહેલેથી જ અન્ય કંપનીઓ સાથે કામ કરતા કર્મચારીઓના વિઝા રિન્યૂ કરાવીને પોતાને ત્યાં રાખ્યા હતા.