Gujarati News

શિકાગો,તા. ૧૧: અમેરિકાના શિકાગોમાં એક શખસે અંધાધૂંધ ફાયરિંગ કરી ૩ લોકોની હત્યા કરી દીધી અને ચાર લોકોને ઘાયલ કરી દીધા. પોલીસની સાથે શહેરના ઉત્ત્।ર ભાગમાં એક પાર્કિંગ સ્થળ પર અથડામણમાં ફાયરિંગ કરનાર શખસ માર્યો ગયો. પોલીસ હત્યાઓ પાછળનું કારણની તપાસ કરી રહી છે. શિકાગોના પોલીસ ઓફિસર ડેવિડ બ્રાઉને જણાવ્યું કે, આ ગોળીબાર શનિવારે બપોરે શરૂ થયો.

બંદૂકધારીએ શિકાગો યુનિવર્સિટીમાં ૩૦ વર્ષના એક વિઘાર્થીને માથામાં ગોળી મારી દીધી. ઘટના સમયે તે હાઈડ પાર્ક વિસ્તારમાં એક પાર્કિંગ ગેરેજમાં પોતાની કારમાં બેઠેલો હતો. તે પછી ૩૨ વર્ષનો બંદૂકધારી જેસન નાઈટેંગલ એક એપાર્ટમેન્ટમાં ગયો અને ત્યાં ૪૬ વર્ષના એક સુરક્ષા ગાર્ડને ગોળી મારી દીધી, જે પોતાના ડેસ્ક પર બેઠેલો હતો. તે પછી તેણે ત્યાં ૭૭ વર્ષની એક મહિલાને પણ ગોળી મારી. ગાર્ડને હોસ્પિટલમાં ખસેડાયો હતો, જયાં તેને મૃત જાહેર કરાયો. જયારે મહિલાની હાલત ગંભીર છે.

તે પછી હુમલાખોરે એક વ્યકિતને બંદૂક બતાવી તેની કાર છીનવી લીધી અને એક દુકાનમાં ગયો અને ત્યાં ગોળીઓ ચલાવી. તેમાં ૨૦ વર્ષના એક યુવકનું મોત થઈ ગયું અને ૮૧ વર્ષની એક મહિલા ઘાયલ થઈ ગઈ. મહિલાની હાલત ગંભીર છે. દુકાનથી બહાર બંદૂકધારીએ કારમાં બેઠેલી ૧૫ વર્ષની એક સગીરા પર ગોળી ચલાવી દીધી. સગીરાની માતા પણ તેની સાથે હતી. તેની હાલત ગંભીર છે.

તે પછી હુમલાખોર ફરી એ દુકાન પર ગયો, પરંતુ ત્યાં પોલીસ ફાયરિંગની ઘટનાની તપાસ કરી રહી હતી. તેણે પોલીસ પર પણ ગોળીઓ ચલાવી. જોકે, કોઈ પોલીસકર્મીને કંઈ ન થયું. જેસન ત્યાં જ ન રોકાયો, પરંતુ તે ત્યાંથી શિકાગોની સરહદ પાસેના ઈવાન્સ્ટોન તરફ પોતાનું વાહન લઈ ગયો. ઈવાન્સ્ટોનના પોલીસ ચીફ ડેમિટ્રાઉસ કુકે જણાવ્યું કે, ત્યાં પણપોલીસકર્મીઓને એક દુકાનની અંદર ગોળીબાર થયાની માહિતી મળી. હકીકતમાં હુમલાખોર એ દુકાનમાં ગયો અને લૂંટની ધમકી આપી ગોળીઓ ચલાવી. જોકે, કોઈને ગોળી ન વાગી.

હુમલાખોર ત્યાંથી પણ નીકળી ગયો અને એક આઈએચઓપી રેસ્ટોરન્ટમાં ગયો, જયાં તેણે એક મહિલાને માથામાં ગોળી મારી દીધી. તેની હાલત નાજુક છે. રેસ્ટોરન્ટની બહાર નીકળ્યા બાદ પોલીસે તેને પાર્કિંગ વિસ્તારમાં ઘેરી લીધો, જયાં પોલીસ સાથેની અથડામણમાં તે માર્યો ગયો.