Gujarati News

શ્રીનગર :જમ્મુ અને કાશ્મીર પોલીસે લશ્કર-એ-તૈયબા (એલઈટી), જૈશ-એ-મોહમ્મદ (જેઈએમ), અલ-બદર અને ધ રેઝિસ્ટન્સ ફ્રન્ટ (ટીઆરએફ) ના 900થી વધુ ઓવર ગ્રાઉન્ડ વર્કર્સ (ઓજીડબલ્યુ) ની ધરપકડ કરી છે. સૂત્રોએ જણાવ્યું કે, કાશ્મીરમાં આતંકવાદીઓ દ્વારા લઘુમતી નાગરિકો પર હુમલા બાદ આ સૌથી મોટી કાર્યવાહી છે.

સૂત્રોએ વધુમાં જણાવ્યું હતું કે, વિવિધ તપાસ એજન્સીઓ દ્વારા તમામ અટકાયતીઓની સંયુક્ત પૂછપરછ ચાલી રહી છે. સૂત્રોનું કહેવું છે કે, એજન્સીઓ ધરપકડ કરાયેલા ઓવર ગ્રાઉન્ડ કામદારોને પૂછવાનો પ્રયાસ કરી રહી છે કે, તે બધા જમ્મુ-કાશ્મીરના લઘુમતી સમુદાયને જ કેમ નિશાન બનાવી રહ્યા છે.

ટીઆરએફના વડાએ ખીણમાં કાશ્મીરી પંડિત ઉદ્યોગપતિ માખન લાલ બિંદુ અને અન્ય બે નાગરિકોના મોતની જવાબદારી લીધી છે. તાજેતરમાં જ જમ્મુ પોલીસ દ્વારા જારી કરાયેલા સત્તાવાર નિવેદનમાં કહેવામાં આવ્યું હતું કે, આતંકવાદીઓએ બિન્દરૂ મેડિકેટના માલિક બિન્દરૂ (68) ને નિશાન બનાવ્યા હતા, જ્યારે તેઓ તેમની ફાર્મસીમાં હતા. આ પછી, લગભગ 8.30 વાગ્યે આતંકવાદીઓએ લાલ બજાર વિસ્તારમાં ગોલગપ્પા વિક્રેતા વીરેન્દ્ર પાસવાનની હત્યા કરી હતી. વીરેન્દ્ર પાસવાન બિહારના ભાગલપુરના રહેવાસી હતા. આ પછી, લગભગ 8.45 વાગ્યે, આતંકીઓએ બાંદીપોરાના શાહગુંડ વિસ્તારમાં એક સામાન્ય નાગરિકની હત્યા કરી. જમ્મુ -કાશ્મીર પોલીસે જણાવ્યું હતું કે, મૃતકની ઓળખ મોહમ્મદ શફી લોન તરીકે થઈ હતી, જે નાઈડખાયનો રહેવાસી હતો.

 અત્રે ઉલ્લેખનીય છે કે, થોડા દિવસ પહેલા દિલ્હીની સ્પેશ્યલ સેલે મોટી કાર્યવાહી કરતા 6 લોકોની ધરપકડ કરવામાં આવી છે. આ બધાનો સંબંધ આઈએસઆઈ (ISI)અને અંડરવર્લ્ડ સાથે બતાવવામાં આવી રહ્યો છે. જાણકારી પ્રમાણે બે આતંકીઓની ટ્રેનિંગ પાકિસ્તાનમાં થઇ હોવાની વાત સામે આવી છે. આ બધા પાસેથી મોટી માત્રામાં હથિયાર અને વિસ્ફોટક પણ મળી આવ્યા છે. સૂત્રોના મતે દિલ્હીની સ્પેશ્યલ સેલે યૂપી એટીએસ સાથે પ્રયાગરાજમાં છાપેમારી કરી તેમની ધરપકડ કરી છે. પ્રયાગરાજના કરેલીમાં આ બધા રોકાયેલા હતા.

પોલીસના સૂત્રોના મતે આ બધા આતંકી દેશના અલગ-અલગ શહેરમાં મોટું ષડયંત્ર રચી રહ્યા હતા અને આવનાર સમયમાં દહેશત ફેલાવવાનો મોટો પ્લાન તૈયાર હતો. જેનો ખુલાસો કરતા સ્પેશ્યલ સેલ અને યૂપી એટીએસે આ બધાને દબોચી લીધા છે. સાથે દેશના ઘણા મોટા અને નામચીન લોકોને પણ આ લોકો પોતાના નિશાને લેવાના હતા.