Gujarati News

પટના તા.11 : . બિહારમાં મુખ્યમંત્રી નીતિશ કુમારે NDAથી અલગ થઈને એક નવું ગઠબંધન બનાવ્યું છે, જેનાથી સમીકરણો એકદમથી પલટાઈ ગયા છે. જેની સીધી અસર મહારાષ્ટ્રમાં પણ જોવા મળી રહી છે. એવામાં હવે અહેવાલો સામે આવી રહ્યા છે કે, શરદ પવારની રાષ્ટ્રવાદી કોંગ્રેસ પાર્ટીએ મહા વિકાસ અઘાડી ચાલુ રાખવાની ઈચ્છા વ્યક્ત કરી છે. જેને લઇ NCP નાં નેતાએ શિવસેના પ્રમુખ ઉદ્ધવ ઠાકરેની મુલાકાત પણ લીધી હતી.

બુધવારે NCPના વરિષ્ઠ નેતાઓ ઠાકરેને મળ્યા હતા. જેમાં વિપક્ષના નેતા અજિત પવાર, પ્રદેશ અધ્યક્ષ જયંત પાટીલ અને પૂર્વ મંત્રીઓ છગન ભુજવાલ, સુનીલ તટકરે જેવા નેતાઓ સામેલ હતા. આ નેતાઓએ ઠાકરેના સત્તાવાર નિવાસસ્થાન માતોશ્રી પર લગભગ એક કલાક સુધી ચર્ચા કરી. ખાસ વાત એ છે કે ઠાકરેના રાજીનામા બાદ એનસીપી અને શિવસેના વચ્ચે કોઈ સંપર્ક થયો નથી.

એક વરિષ્ઠ નેતાએ નામ ન આપવાની શરતે જણાવ્યું હતું કે, "એનસીપી નેતૃત્વનું માનવું છે કે ઠાકરેએ સમજવાની જરૂર છે કે શા માટે તેમની એકતા તેમના પોતાના અસ્તિત્વ માટે જરૂરી છે." "કાનૂની લડાઈ લાંબી ચાલવાની સંભાવના છે, પરંતુ જો ત્રણેય પક્ષો સાથે રહે છે અને સાથે ચૂંટણી લડે છે, તો રાજ્યમાં રાજકીય લાભ પણ તેમના પક્ષમાં થશે," તેમણે કહ્યું.

તેમણે કહ્યું કે નીતીશ કુમાર વિપક્ષી પાર્ટીઓમાં સામેલ થવાથી રાષ્ટ્રીય સ્તરે પણ રાજકીય ચિત્ર બદલાઈ ગયું છે. તેમણે કહ્યું કે જો તમામ વિપક્ષી પાર્ટીઓ સાથે આવે તો પરિસ્થિતિ બદલાઈ શકે છે. વર્ષ 2019માં શિવસેના, એનસીપી અને કોંગ્રેસે સાથે મળીને મહા વિકાસ અઘાડીની સરકાર બનાવી હતી, પરંતુ શિવસેનાના ધારાસભ્યોના બળવાને કારણે સરકાર પડી ગઈ હતી.