Gujarati News

Gujarati News

News of Tuesday, 13th February 2024

અશોક ચવ્‍હાણ કોંગ્રેસ છોડયાના એક દિવસ બાદ ભાજપમાં જોડાયા

આવતીકાલે રાજ્‍યસભાની આગામી ચૂંટણી માટે ઉમેદવારી પત્રો ભરશે

મુંબઇ તા. ૧૩ : મહારાષ્ટ્રના પૂર્વ મુખ્‍યમંત્રી અશોક ચવ્‍હાણ કોંગ્રેસ છોડ્‍યાના એક દિવસ બાદ આજે ભાજપમાં જોડાયા છે. ભૂતપૂર્વ સાંસદ, જે રાજકીય રીતે મહત્‍વપૂર્ણ રાજયમાં કોંગ્રેસ માટે એક અગ્રણી ચહેરો હતા, નાયબ મુખ્‍ય પ્રધાન દેવેન્‍દ્ર ફડણવીસે ભાજપમાં આવકાર્યા હતા.

સૂત્રોએ જણાવ્‍યું હતું કે, આવતીકાલે રાજયસભાની આગામી ચૂંટણી માટે ઉમેદવારી પત્રો ભરશે. વાસ્‍તવમાં, તે નામાંકનની સમયમર્યાદા છે જેણે કોંગ્રેસના પ્રાથમિક સભ્‍યપદમાંથી રાજીનામું આપ્‍યાના એક દિવસ પછી જ તેમને ભાજપમાં જોડાવાની પ્રેરણા આપી હતી.

અશોક ચવ્‍હાણ જે ડિસેમ્‍બર ૨૦૦૮ થી નવેમ્‍બર ૨૦૧૦ સુધી મહારાષ્ટ્રના મુખ્‍ય પ્રધાન હતા, તેમને મહારાષ્ટ્રના સૌથી પ્રભાવશાળી કોંગ્રેસી નેતાઓમાંના એક ગણવામાં આવતા હતા. તેઓ મહારાષ્ટ્રના પૂર્વ મુખ્‍યમંત્રી શંકરરાવ ચવ્‍હાણના પુત્ર છે. અશોક ચવ્‍હાણ મહારાષ્ટ્ર પ્રદેશ કોંગ્રેસ સમિતિના મહાસચિવ સહિત પાર્ટીમાં વિવિધ હોદ્દા પર રહ્યા છે.

અશોક ચવ્‍હાણના કોંગ્રેસ છોડવા પર મહારાષ્ટ્રના ડેપ્‍યુટી સીએમ અને બીજેપી દેવેન્‍દ્ર ફડણવીસે કહ્યું, ‘જુઓ  વિવિધ પાર્ટીઓના ઘણા મોટા નેતાઓ ભારતીય જનતા પાર્ટીમાં જોડાવા માંગે છે. ખાસ કરીને કોંગ્રેસના ઘણા નેતાઓ અમારા સંપર્કમાં છે, કારણ કે કોંગ્રેસ પાર્ટીના ટોચના નેતાઓનું જે પ્રકારનું વર્તન હતું, એક રીતે આ તમામ નેતાઓ તેમના પક્ષમાં ગૂંગળામણ અનુભવતા હતા. કોંગ્રેસના જાહેર નેતાઓને લાગે છે કે આપણે દેશની મુખ્‍ય ધારા સાથે કામ કરવું જોઈએ.'

(4:22 pm IST)