Gujarati News

Gujarati News

News of Thursday, 13th May 2021

રાજસ્થાનઃ પુત્રવધુના પ્રેમમાં પાગલ સસરાએ કરી પુત્રની હત્યાઃ બંનેની પોલીસે કરી ધરપકડ

અનોખી લવસ્ટોરીઃ પત્નિએ પતિને ઘેનની ગોળી નાખી લીંબુનું શરબત આપ્યું: સસરાએ કરંટ આપી પતાવી દીધો

જેસલમેર, તા.૧૩: વહુ સાથે લફરું ધરાવતા સસરાએ પોતાના જ સગા દીકરાની હત્યા કરી નાખી છે. રાજસ્થાનના જેસલમેરના આસ્કાન્દ્રા ગામની આ ઘટનામાં પોલીસે આરોપી સસરાની સાથે વહુની પણ ધરપકડ કરી છે. પ્રાપ્ત વિગતો અનુસાર, વહુએ પોતાના પતિના મર્ડરમાં સસરાને મદદ કરી હતી. આરોપીએ પોતાના દીકરાને કરંટ આપીને મોતને ઘાટ ઉતાર્યો હતો.

આ હત્યા ૧૫ દિવસ પહેલા થઈ હતી. જેને અકસ્માતમાં ખપાવી દેવાનો પ્રયાસ થયો હતો. મૃતક હીરાલાલને તેની પત્ની પારલીએ ૨૫મી એપ્રિલે રાત્રે ઊંદ્યની દવાઓ ભેળવીને લીંબુનું શરબત આપ્યું હતું. જેને પીધા બાદ બેહોશ થઈ ગયેલા હીરાલાલને તેના પિતા મુકેશ કુમાર અને તેની પત્નીએ ભેગા મળીને કરંટ આપીને મોતને ઘાટ ઉતાર્યો હતો. બીજા દિવસે સવારે જ ઉતાવળમાં તેની અંતિમવિધિ કરી દેવામાં આવી હતી.

જિલ્લા એસપી અજય સિંઘના જણાવ્યા અનુસાર, ૬મેના રોજ મૃતકના ભાઈ ભોમરાજે તેના ભાઈના મોત અંગે પોલીસ ફરિયાદ નોંધાવી હતી. મૃતક હીરાલાલની અંતિમવિધિ ૨૬મી એપ્રિલે કરી દેવાઈ હતી. તે વખતે ફરિયાદીના પિતરાઈએ બોડીના ફોટા લીધા હતા. જેમાં તેના શરીર પર દાઝયાના નિશાન દેખાતા હતા. આ નિશાન પર શંકા વ્યકત કરતાં તેણે પોલીસ ફરિયાદ કરી હતી.

ફરિયાદના આધારે પોલીસે તપાસ શરુ કરી દાટી દેવામાં આવેલી બોડીને બહાર કાઢીને તેનું પીએમ કરાવ્યું હતું. હીરાલાલની પત્નીની પણ પોલીસે પૂછપરછ શરુ કરી હતી. જેમાં તેનો રોલ શંકાસ્પદ જણાયો હતો. આખરે પોલીસે કડકાઈથી પૂછપરછ કરતાં હીરાલાલની પત્નીએ પોતાનો ગુનો કબૂલી લીધો હતો.

મૃતકની પત્નીએ પોલીસને જણાવ્યું હતું કે હીરાલાલ દારુડિયો હતો અને કંઈ કમાતો પણ નહોતો. તે વારંવાર તેની સાથે ઝઘડા કરતો હતો. આ દરમિયાન તે તેના સસરાની નજીક આવી હતી, અને બંને વચ્ચે પ્રેમસંબંધો બંધાયા હતા. જોકે, હીરાલાલ તેમાં વચ્ચે આવતો હોવાથી બંનેએ તેનો કાંટો કાઢી દેવાનું નક્કી કર્યું હતું. હીરાલાલની પત્નીની કબૂલાતના આધારે પોલીસે બંને આરોપીઓની ધરપકડ કરી હતી.

(4:22 pm IST)