Gujarati News

Gujarati News

News of Tuesday, 13th July 2021

નામ બડે દર્શન ખોટે

અમીરી એવી કે ૮ કરોડની રોલ્સ રોયસનાં માલિક અને ધંધો એવો કે ૩૫૦૦૦ રૂ.ની વીજચોરીનો કેસ

બિલ્ડરની કન્સ્ટ્રકશન સાઈટ પર વીજ કંપનીએ દરોડો પાડીને ચોરી પકડી, બિલ સાથે દંડ પણ ફટકાર્યોઃ માર્ચ મહિનામાં પકડાયેલી ચોરીનો ત્રણ મહિના સુધી દંડ ના ભરતા આખરે પોલીસ ફરિયાદ કરવામાં આવીઃ બિલ્ડરનો પોતાની સામે ખોટી રીતે ફરિયાદ કરાઈ હોવાનો દાવોઃ કહ્યું ચોરી કરી હતી તો મીટર કેમ ના હટાવાયું?

કલ્યાણ, તા.૧૩: ઘણીવાર સો-બસ્સો રુપિયા માટે પણ માથાકૂટ કરતાં કરોડપતિઓને તમે જોયા હશે, પરંતુ મહારાષ્ટ્રમાં એક કરોડપતિએ તો લાલચની તમામ હદ વટાવી દીધી છે. આઠ કરોડ રુપિયાની રોલ્સ રોયસ ફેરવતો આ કરોડપતિ બિલ્ડર ૩૫ હજાર રુપિયાની વીજળી ચોરી કરતા પકડાયો છે. આ મામલે તેના પર કેસ કરવામાં આવ્યો છે. સંજય ગાયકવાડ નામનો આ બિલ્ડર શિવસેનાનો આગેવાન પણ છે.

ગત સપ્તાહે જ મહારાષ્ટ્ર સ્ટેટ ઈલેકિટ્રસિટી ડિસ્ટ્રિબ્યુશન કંપની લિમિટેડ દ્વારા ગાયકવાડ સામે કેસ કરવામાં આવ્યો હતો. માર્ચ મહિનામાં સરકારી વીજ કંપની દ્વારા ગાયકવાડની એક કન્સ્ટ્રકશન સાઈટ પર રેડ કરવામાં આવી હતી. જે દરમિયાન આ વીજળી ચોરી પકડાઈ હતી. ત્યારબાદ તેને ૩૪,૮૪૦ રુપિયાનું બિલ મોકલવાની સાથે ૧૫ હજાર રુપિયાનો દંડ પણ ફટકારવામાં આવ્યો હતો.

જોકે, ત્રણ મહિના બાદ પણ બિલ્ડરે બિલ તેમજ દંડની રકમ ના ભરતા આખરે વીજ કંપની દ્વારા આ મામલે કલ્યાણના મહાત્મા ફુલે પોલીસ સ્ટેશનમાં ગયા સપ્તાહે ફરિયાદ નોંધાવવામાં આવી હતી. કાયદાનો ડંડો ઉગામવામાં આવતા જ ગાયકવાડે પોલીસ ફરિયાદ નોંધાયાના ગણતરીના સમયમાં જ બિલ અને દંડની રકમ જરાય મોડું કર્યા વિના ભરી દીધી હતી. મહારાષ્ટ્રના કાયદા અનુસાર, વીજ ચોરીના કેસમાં ત્રણ વર્ષની સજા અને દંડ અથવા બંને થઈ શકે છે. બીજી તરફ, ચોરી કરતા પકડાયેલા બિલ્ડર ગાયકવાડે એવો દાવો કર્યો છે કે સરકારી વીજ વિતરણ કંપનીએ તેના પર ખોટો કેસ કર્યો છે. જો તેણે વીજળીની ચોરી કરી જ હોય તો પછી તેની સાઈટ પરથી મીટરને કેમ ના હટાવાયું?

(3:16 pm IST)