Gujarati News

કોલંબો તા. ૧૪ : શ્રીલંકામાં ખોરાકની કટોકટી છે. કોરોના રોગચાળા પહેલા, ૨૨ મિલિયન વસ્‍તીમાંથી લગભગ ૧૦ ટકા લોકો ખાદ્ય સુરક્ષાના મુદ્દાઓ અને આર્થિક પ્રતિબંધો સામે ઝઝૂમી રહ્યા હતા અને રાસાયણિક ખાતરોના ઉપયોગ પર સંપૂર્ણ પ્રતિબંધને કારણે પરિસ્‍થિતિ વધુ ખરાબ થઈ છે. દેશની સેન્‍ટ્રલ સ્‍ટેટિસ્‍ટિકલ એજન્‍સી દ્વારા સોમવારે જારી કરવામાં આવેલા આંકડા પરથી આ માહિતી મળી છે.

સંયુક્‍ત રાષ્ટ્રનો અંદાજ છે કે દેશની લગભગ એક તૃતીયાંશ વસ્‍તીને ખાદ્ય સહાયની જરૂર છે. તેમની પાસે આવશ્‍યક ખાદ્ય પદાર્થો અને પોષક તત્‍વોનો અભાવ છે. વસ્‍તીગણતરી અને આંકડાશાષા વિભાગ અનુસાર, વર્ષ ૨૦૧૯ ના અંત સુધીમાં, શ્રીલંકાની વસ્‍તીના ૯.૧ ટકા લોકો પાસે આવશ્‍યક ખાદ્ય પદાર્થોનો અભાવ હતો. તેમાંથી ૨,૦૦,૦૦૦ લોકો ભૂખમરાની આરે છે. ડેટા અનુસાર, ઘરેલું સ્‍તરે ખોરાકની અસુરક્ષા વધીને ૯.૪૫ ટકા થઈ ગઈ છે. તે જણાવે છે કે દર ૧૦માંથી એક પરિવાર આવશ્‍યક ખોરાક અને પોષક તત્‍વોની અછતથી પીડાય છે.

વિભાગે કહ્યું કે જો કે, કોવિડ-૧૯ના રોકથામ માટે લાદવામાં આવેલા વિવિધ નિયંત્રણોને કારણે ૨૦૨૦માં સ્‍થિતિ વધુ ખરાબ થઈ છે. આનાથી લોકોની આજીવિકા પર અસર પડી અને તેઓ ગરીબીની જાળમાં ફસાઈ ગયા.રાષ્ટ્રપતિ ગોટાબાયા રાજપક્ષેએ ગયા વર્ષે એપ્રિલમાં રાસાયણિક ખાતરોના ઉપયોગ પર સંપૂર્ણ પ્રતિબંધ મૂક્‍યો હતો. આનાથી દેશમાં ચોખા અને અન્‍ય આવશ્‍યક ખાદ્ય ચીજોના ઉત્‍પાદન પર પ્રતિકૂળ અસર પડી છે.

ખાતર પર પ્રતિબંધ પહેલા શ્રીલંકા ચોખાના ઉત્‍પાદનમાં આત્‍મનિર્ભર હતું. દેશમાં વિદેશી મુદ્રા ભંડારની અછતને કારણે સ્‍થિતિ વધુ વણસી છે. શ્રીલંકામાં યુએનના પ્રાદેશિક સંયોજક હાના સિંગર હમ્‍ડીએ જણાવ્‍યું હતું કે હાલમાં લગભગ ૪.૯ મિલિયન લોકોને ખાદ્ય સુરક્ષાની જરૂર છે. આ દેશની વસ્‍તીના લગભગ ૨૫ ટકા છે.