Gujarati News

તિરૂવનંતમપુરમ,તા. ૧૪:   કેરળમાં એક પરંપરાગત હોડીમાં ચપ્પલ પહેરીને ચઢ્યા બાદ મંદિરના રીત-રિવાજોના ભંગ કરવાના આરોપમાં તપાસનો સામનો કરી રહેલી મલયાલમ ટીવી ધારાવાહિકની એક અભિનેત્રીની શનિવારે ધરપકડ કરવામાં આવી છે. ધરપકડ બાદ અભિનેત્રીનું નિવેદન નોંધવામાં આવ્યું હતું. પોલીસના કહેવા અનુસાર અભિનેત્રી નિમિષા અને કથિત રીતે ફોટો ખેંચવામાં મદદ કરનાર મિત્રનું નિવેદન પણ નોંધવામાં આવ્યું છે. જોકે, બાદમાં બંનેને જામીનના આધારે છોડી મૂકવામાં આવ્યા છે. પોલીસે મીડિયા સાથેની વાતચીતમાં કહ્યું કે, પહેલા અમે કેસ નોંધ્યો હતો. આજે અમે પોલીસ સ્ટેશન બોલાવીને ધરપકડ કરી હતી. નિવેદન નોંધ્યા બાદ પોલીસમાં જામીન લઈને છોડી દીધા છે.

આ પહેલાં અભિનેત્રી નિમિષાએ બુધવારે ફોન અને સોશ્યલ મીડિયા પ્લેટફોર્મ થકી અજ્ઞાત લોકો દ્વારા ધમકી આપ્યાની ફરિયાદ કરી હતી. અહીંયા નોંધવું રહ્યું કે, મલયાલમ ધારાવાહિક અભિનેત્રી પર આરોપ છે કે તેણે એક ધાર્મિક કાર્યક્રમમાં ચપ્પલ પહેરીને હોડી પર બેસીને મંદિરના રીત-રિવાજોનો ભંગ કર્યો છે. આ મામલે હંગામો મચ્યા બાદ અભિનેત્રી દ્વારા ખુલાસો કરવામાં આવ્યો હતો. અભિનેત્રીએ કહ્યું કે મને એ ખબર નહતી કે 'પલ્લીયોદમ'(રસ્મી સર્પ હોડી) પર પગ રાખવા એ ધાર્મિક રીત-રિવાજ વિરુદ્ઘની બાબત છે.