Gujarati News

જબલપુર, તા.૧૫ : પતિ-પત્ની બંને નોકરી કરતા હોય અને ઘરમાં બાળકોનું ધ્યાન રાખવા માટે કોઈ વડીલ કે બીજું કોઈ ન હોય ત્યારે ઘણી સમસ્યાનો સામનો કરવો પડતો હોય છે. જેના કારણે બાળકોની દેખરેખ માટે આયા રાખવાનું ચલણ વધી ગયું છે. જો તમે પણ તમારા બાળકોની દેખરેખ માટે આયા રાખેલી છે, તો જબલપુરની આ ઘટના તમારા માટે ચેતવણીરૂપ છે. જબલપુરમાં એક આયાની ક્રૂરતાનો વિડીયો સામે આવ્યો છે. જેમાં આયા બે વર્ષના માસૂમ સાથે રાક્ષસ જેવું વર્તન કરી રહી છે. તે માસૂમના વાળ પકડીને તેને માર મારતી જોવા મળી રહી છે.

સરકારી નોકરી કરતા કપલે તેમના બાળકની સારસંભાળ રાખવા માટે ચાર મહિના પહેલા એક આયા રાખી હતી. જોકે, તે પછી આ દંપતીએ જોયું કે તેમનો બાળક ગુમસૂમ રહેવા લાગ્યો હતો. તેમણે ડોક્ટરનો સંપર્ક કર્યો તો જાણવા મળ્યું કે, બાળકના આંતરડામાં સોજો છે. તે પછી તેમણે બાળકના રૂમમાં સીસીટીવી કેમેરા લગાવ્યા. જ્યારે તેમણે સીસીટીવી ફૂટેજ જોયા તો ચોંકી ગયા. તેમાં જોવા મળ્યું કે, તે બંને ઘરથી નોકરી જવા નીકળે તે પછી આયા તેમના બાળકની સાથે ક્રૂર વર્તન કરતી હતી. તે બાળકને માર મારતી હતી. તેના વાળ ખેંચીને તેને ઢસડતી હતી. એટલું જ નહીં, તે બાળકના ભાગનું ખાવા ખાઈ જતી હતી અને દૂધ પણ પોતે પી જતી હતી. તેમજ ક્યારેક તો પોતાનું એંઠું બાળકને ખવડાવતી હતી. તે પછી તેમણે આયા વિરુદ્ધ પોલીસમાં ફરિયાદ નોંધાવી એડિશનલ એસપી સંજય અગ્રવાલે જણાવ્યું કે, આ કપલ સ્ટાર કપલ કોલોનીમાં રહે છે. પતિ વીજળી વિભાગમાં કામ કરે છે જ્યારે પત્ની જિલ્લા કોર્ટમાં નોકરી કરે છે. તેમણે ચમનનગરમાં રહેતી રજની ચૌધરીને તેમના બાળકની દેખરેખ માટે આયા તરીકે ચાર મહિના પહેલા નોકરીએ રાખી હતી. તે પછીથી તેમના બાળકના વર્તનમાં ઘણું પરિવર્તન આવી ગયું હતું અને તેની તબિયત પણ સારી રહેતી ન હતી. તેથી પતિ-પત્ની તેમના બાળકને ડોક્ટર પાસે લઈ ગયા હતા.

તે પછી તેમણે પોતાના ઘરમાં સીસીટીવી કેમેરા લગાવ્યા. તેમાં આયા તેમના બાળકને પેટમાં ઘૂસા મારતી, થપ્પડો મારતી અને વાળ ખેંચીને ઢસડતી જોવા મળી. આ જોઈ તેમણે ફરિયાદ નોંધાવી હતી. જેના આધારે આયાની ધરપકડ કરી લેવામાં આવી છે.