Gujarati News

પટણા, તા. ૧૬ : એક ખાનગી સ્કૂલના પ્રિન્સિપાલને ૧૧ વર્ષની છોકરી પર વારંવાર દુષ્કર્મ ગુજારી તેને પ્રેગનેન્ટ કરી દેવાના આરોપમાં કસૂરવાર ઠેરવી કોર્ટે ફાંસીની સજા ફટકારી છે. ભોગ બનનારી બાળકીના પિતા મજૂરીનું કામ કરે છે, અને તેની કપરી આર્થિક સ્થિતિને જોતાં કોર્ટે પિડિતાને ૧૫ લાખ રુપિયા વળતર આપવાનો પણ હુકમ કર્યો છે.

આ કેસમાં પટણા એડિશનલ ડિસ્ટ્રિક્ટ જજ અવધેશ કુમારની સ્પેશિયલ કોર્ટે ગુનેગાર ઠરેલા પ્રિન્સિપાલ અરવિંદ કુમાર ઉર્ફે રાજ સિંઘાનિયા (ઉં. ૩૧ વર્ષ)ને એક લાખ રુપિયા દંડ પણ ફટકાર્યો છે. કોર્ટે મુખ્ય આરોપીને મદદ કરનારા શિક્ષક અભિષેક કુમાર (ઉં. ૨૯ વર્ષ)ને પણ આજીવન કેદની સજા ફટકારી તેને ૫૦ હજારનો દંડ પણ કર્યો છે. દંડની રકમ પિડિતાને આપવા માટે કોર્ટે જણાવ્યું છે.

પ્રિન્સિપાલ અરવિંદ પોતે જ પટણામાં આવેલી ખાનગી સ્કૂલનો માલિક હતો. તેણે જુલાઈથી ઓગષ્ટ ૨૦૧૮ દરમિયાન તેની જ સ્કૂલમાં ભણતી ૧૧ વર્ષની છોકરીને પોતાની હવસનો શિકાર બનાવી હતી. તેણે આચરેલા કૃત્યની ગંભીરતા જોતાં કોર્ટે જણાવ્યું હતું કે આરોપીને આ મામલે ફાંસીથી ઓછી કોઈ સજા ના થઈ શકે.

સરકારી વકીલ સુરેશ ચંદ્ર પ્રસાદના જણાવ્યા અનુસાર, અવારનવાર રેપ થયા બાદ એકવાર પિડિતાની તબિયત બગડી હતી. તેને અચાનક ઉલ્ટીઓ થવા લાગતા તેના માતા-પિતા તેને ડૉક્ટર પાસે લઈ ગયા હતા, જ્યાં તે પ્રેગનેન્ટ હોવાનું ખૂલ્યું હતું. ૧૧ વર્ષની છોકરી પ્રેગનેન્ટ છે તે જાણી તેના મા-બાપના પગ નીચેથી જમીન સરકી ગઈ હતી. આખરે છોકરીએ આ અંગે બધી વાત કરતાં તેમણે પ્રિન્સિપાલ અને એક શિક્ષક વિરુદ્ધ ફરિયાદ કરતા સપ્ટેમ્બર ૨૦૧૮ના રોજ બંનેની ધરપકડ કરાઈ હતી.કોર્ટમાં રજૂ કરવામાં આવેલી વિગતો અનુસાર, પ્રિન્સિપાલને રેપ કરવામાં મદદ કરનારા શિક્ષકે છોકરીને સૌપ્રથમવાર પ્રિન્સિપાલ તારું પેપર ચેક કરી રહ્યા છે તેમ કહીને એક રુમમાં મોકલી હતી. તે રુમમાં બેડ પણ હતો, જ્યાં બે મહિનાના ગાળામાં છોકરી પર કમસે કમ છ વાર રેપ કરવામાં આવ્યો હતો. આરોપીઓની ધરપકડ થઈ ગઈ તે વખતે પિડિતા પ્રેગનેન્ટ હતી, અને કોર્ટની અનુમતિ બાદ તેનો ગર્ભપાત કરવામાં આવ્યો હતો.

એબોર્શન બાદ ભ્રૂણના ડીએનએ સેમ્પલ લઈને તેને ફોરેન્સિક લેબમાં મોકલવામાં આવ્યા હતા. ભ્રૂણના ડીએનએ આરોપી અરવિંદ સાથે મેચ થતાં તેણે જ દુષ્કર્મ કર્યો હોવાનું પુરવાર થઈ ગયું હતું. પિડિતાએ પણ જ્યુડિશિયલ મેજિસ્ટ્રેટ સમક્ષ કલમ ૧૬૪ હેઠળ પોતાનું નિવેદન નોંધાવ્યું હતું. પોતાના નિવેદનને તે ટ્રાયલ દરમિયાન પણ વળગી રહી હતી, અને ડીએનએ સેમ્પલ પણ સૌથી મજબૂત પુરાવો સાબિત થયું હતું. આ કેસમાં કોર્ટમાં કુલ છ સાક્ષી રજૂ કરવામાં આવ્યા હતા, જેમાં પિડિતા ઉપરાંત તપાસ અધિકારી અને મહિલા પોલીસ સ્ટેશનના સ્ટેશન હાઉસ ઓફિસરનો પણ સમાવેશ થાય છે. જે સ્કૂલમાં પિડિતા ભણતી હતી તેમાં પાંચમા ધોરણ સુધીના વર્ગો હતા. જોકે, સ્કૂલમાં પ્રિન્સિપાલે જ છોકરી પર રેપ કર્યો હોવાની વાત જાહેર થતાં તે સ્કૂલને તાળાં લાગી ગયા હતા.