Gujarati News

Gujarati News

News of Monday, 17th May 2021

એક દુલ્હન-બે દુલ્હા : પરણવા બે વરરાજા પહોંચી ગયા : બાદમાં તસ્કીબ થકી બંનેને જીવનસંગીની મળી

એક હતો યુવતીનો પ્રેમી અને બીજો હતો યુવતી માટે પરિવારે પસંદ કરેલો યુવક : મામલો ગુંચવાતા પોલીસ બોલાવવી પડી : પછી થયું અનોખુ સમાધાન

કન્નોજ,તા. ૧૭: કોરોના કાળમાં લગ્નો કરવા એક મોટી સમસ્યા થઈ ગઈ છે. મહેમાનોને આમંત્રણ આપવાથી લઈને લગ્નના સમય સુધી બધા પર કડક નિયમો લાગુ કરી દેવાયા છે. પણ, ઉત્ત્।ર પ્રદેશના કન્નોજ જિલ્લામાં તો એક લગ્નમાં બધું જ બરાબર ગોઠવાઈ ગયા બાદ એક એવી સમસ્યા ઊભી થઈ ગઈ કે બધા માથું ખંજવાળવા લાગી ગયા હતા. બન્યું એવું કે, અહીં એક કન્યાને પરણવા માટે બે વરરાજા પહોંચી ગયા. પછી જે સમાધાન કરવામાં આવ્યું તેણે બધાને ચોંકાવી દીધા.

આશ્ચર્યની વાત એ છે કે, જે બે વરરાજા લગ્નના મંડપમાં પહોંચ્યા તેમાંથી એક યુવતીનો પ્રેમી હતો, જયારે બીજાને યુવતીના પરિવારે તેના માટે પસંદ કર્યો હતો. મંડપમાં બે વરરાજા પહોંચતા હોબાળો મચી ગયો. આ અજબ ઘટના કન્નોજ જિલ્લાના કકલાપુર ગામની છે.

કકલાપુર ગામમાં સૌરિખ ગામથી જાન આવી હતી. જાનનું સ્વાગત કરવા કન્યાના પરિવારજનો પહોંચ્યા અને જયારે લગ્નની વિધી ચાલી રહી હતી, એ જ સમયે ત્યાં દુલ્હનનો પ્રેમી પણ જાન જોડીને આવી પહોંચ્યો. પ્રેમીને જોઈને યુવતીનો ખુશ થઈ ગઈ, પરંતુ બાકીના લોકો ચોંકી ગયા.

પ્રેમીને જાન જોડીને આવેલો જોઈ યુવતીએ માતા-પિતાએ પસંદ કરેલા યુવક સાથે લગ્ન કરવાનો ઈનકાર કરી દીધો. એ પહેલા કે ત્યાં કોઈ મોટી બબાલ થાય, પોલીસને જાણ કરી દેવામાં આવી. પોલીસે ત્યાં પહોંચી પ્રેમી અને દુલ્હનને કસ્ટડીમાં લઈ લીધા. તે પછી બંને પક્ષોમાં સમાધાન માટે વાતચીત થવા લાગી. અહીં ચોંકાવનારી વાત તો એ છે કે, યુવતીના પ્રેમીના પણ બીજી છોકરી સાથે લગ્ન થઈ ગયા હતા અને ૨૩ જૂને લગ્ન નક્કી કરાયા હતા, પરંતુ એ પહેલા તે પ્રેમિકાના ઘરે પહોંચી ગયો.

દરમિયાનમાં પ્રેમીના જે યુવતી સાથે લગ્ન નક્કી થયા હતા, તેનો પરિવાર પણ અહીં પહોંચી ગયો અને યુવકના તેની પ્રમિકા સાથેના લગ્નનો વિરોધ કરવા લાગ્યો. મામલો જબરો ગોટાળે ચડ્યો. ત્રણે પક્ષોમાં કલાકો સુધી વાતચીત ચાલી. તે પછી જે યુવતીના ઘરે બે વરરાજા પહોંચી ગયા હતા તેના પરિવારે તેમણે પસંદ કરેલા યુવકનો સામાન પાછો આપી દીધો. યુવકે પણ યુવતીના પરિવારે આપેલી બાઈક પાછી આપી દીધી.

બીજી તરફ યુવતીના પ્રેમીએ પણ જયાં લગ્ન નક્કી થયા હતા તે પરિવારને રૂપિયા પાછા આપી સમજૂતી કરી લીધી. ત્રણે પક્ષોએ પોત-પોતાના સમજૂતી પત્રો પોલીસે સોંપ્યા, તે પછી કકલાપુર ગામની યુવતીના તેના પ્રેમી સાથે પોલીસની હાજરીમાં લગ્ન કરાવી દેવાયા.

ઘટનામાં આટલું ટ્વીસ્ટ ઓછું હોય તેમ વધુ એક વળાંક આવ્યો. સૌરિખ ગામનો જે યુવક કકલાપુર જાન લઈને આવ્યો હતો, તે પોતાના લગ્ન તૂટવાથી દુઃખી હતો. આ દ્યટનાક્રમ બાદ ગામનો જ એક પરિવાર આગળ આવ્યો અને તેણે પોતાની દીકરીના લગ્નનો પ્રસ્તાવ આ યુવક સામે મૂકયો. જે યુવકે તરત સ્વીકારી લીધો. બાદમાં એ જ દિવસે રાત્રે એ બંનેના પણ લગ્ન કરાવી દેવાયા.

(10:25 am IST)