Gujarati News

Gujarati News

News of Thursday, 17th September 2020

એર ઈન્ડિયાને તાળું મારી દેવું પડે તેવી પરિસ્થિતિ

સરકારી વિમાની કંપની પર ૬૦ હજાર કરોડનું દેવું : એરક્રાફ્ટ સુધારા ખરડાને રાજ્યસભામાં રજૂ કરતા પહેલાં ઉડ્ડયન ખાતાના પ્રધાન પુરીએ મંગળવારે અણસાર આપ્યો

નવી દિલ્હી, તા.૧૬ : સરકારને એર ઇન્ડિયાનું ખાનગીકરણ કરવાની યોજના અભેરાઈએ ચઢાવી દેવી પડે તેમ લાગે છે. એર ઇન્ડિયાને વેચી નાખવા માટે કેન્દ્ર સરકારે કરેલી જાહેરાત પછી હાલ એનું લેવાલ કોઇ દેખાતું નથી. આ સંજોગોમાં કેન્દ્ર સરકાર એર ઇન્ડિયાને કાયમ માટે તાળું મારી દે એવી શક્યતા જણાતી હતી. હાલ એર ઇન્ડિયા પર રૂપિયા ૬૦, ૦૦૦ કરોડનું દેવું છે. કેન્દ્રના જાહેર ઉડ્ડયન ખાતાના પ્રધાન હરદીપ સિંઘ પુરીએ એવો અણસાર આપ્યો હતો કે એર ઇન્ડિયા ખરીદવા કોઇ આગળ નહીં આવે તો મેાદી સરકાર એને કાયમ માટે તાળું મારી દઇ શકે છે.

          અત્યારે માત્ર બે વિકલ્પો છે - કાં તો એને વેચી દેવી અથવા એને તાળાં મારી દેવાં. એરક્રાફ્ટ સુધારા ખરડાને રાજ્યસભામાં રજૂ કરવા પહેલાં હરદીપ સિંઘે મંગળવારે આ અણસાર આપ્યો હતો. જો કે એમણે એવી આશા વ્યક્ત કરી હતી કે એર ઇન્ડિયાને નવો માલિક જરૂર મળી જશે. તેમણે એવી માહિતી પણ આપી હતી કે છેક ૨૦૧૧-૧૨થી આજ સુધીમાં સરકાર એર ઇન્ડિયાને ૩૦,૫૨૦ કરોડ રૂપિયાની મદદ કરી ચૂકી છે.  આટલી રકમ શિક્ષણ, સ્વાસ્થ્ય કે સામાજિક કાર્યો પાછળ વાપરી શકાઇ હોત. પરંતુ એર ઇન્ડિયાના સેંકડો કર્મચારીઓને ખુવાર થતાં અટકાવવા સરકાર અત્યાર સુધી એ ઇન્ડિયાને સતત આર્થિક મદદ કરતી રહી હતી.

કેન્દ્ર સરકારે આ કંપની ખરીદવા માટેની બોલી લગાડવાની છેલ્લી તારીખ વધારીને ઑક્ટોબરની ૩૦મી સુધી લંબાવી હતી. કોરોનાના  કારણે દુનિયા આખીના અર્થતંત્ર પર અસર પડી હતી. એ ધ્યાનમાં રાખીને કેન્દ્ર સરકારે બોલી લગાડવાની તારીખ લંબાવી હતી. એર ઇન્ડિયા વેચવાની તૈયારી આમ તો આ વર્ષના જાન્યુઆરીની ૨૭મીથી સરકારે શરૂ કરી દીધી હતી. એર ઇન્ડિયાની સ્થાપનામાં નિમિત્ત બનેલા તાતા ગ્રુપે એર ઇન્ડિયા ખરીદવાની તૈયારી દાખવી હતી.

(8:58 pm IST)
  • ચીનના જાસૂસી કાંડ મામલે તપાસ :ચીની કંપનીના જાસૂસી કાંડ મામલે કેન્દ્ર સરકારે રાષ્ટ્રીય સાયબર સુરક્ષા સમન્વયકના વડપણ હેઠળ કમિટીની રચના :30 દિવસમાં માંગ્યો રિપોર્ટ access_time 1:03 am IST

  • ધારાશાસ્ત્રીએ દસ લાખના : વળતરની માગણી કરી : મોટર એકલા ચલાવતી વેળાએ માસ્ક નહિ પહેરવા સબબ એક ધારાશાસ્ત્રીને પાંચસો રૂપિયાનો દંડ ફટકારવામાં આવતા તેમણે દિલ્હી હાઇકોર્ટમાં પડકાર ફેંકી દસ લાખ રૂપિયાના વળતરની માગણી કરી છે. access_time 7:32 pm IST

  • દેશના પ્રધાનમંત્રી નરેન્દ્ર મોદી આજે 70 વર્ષના થયા છે. દેશભરમાં ભારતીય જનતા પાર્ટી PM મોદીના જન્મદિવસને 'સેવા સપ્તાહ' તરીકે મનાવી રહી છે. આ સાથે જ દિગ્ગજ નેતાઓ દ્વારા PM મોદીને જન્મદિવસની શુભેચ્છાઓ પાઠવવામાં આવી રહી છે. રાષ્ટ્રપતિ રામનાથ કોવિંદથી લઇને ગૃહમંત્રી અમિત શાહ, રક્ષા મંત્રી રાજનાથસિંહ, કોંગ્રેસ નેતા રાહુલ ગાંધી અને અન્ય મોટા નેતાઓએ પીએમ મોદીને જન્મદિવસની શુભેચ્છા પાઠવી. access_time 9:17 am IST