Gujarati News

લખનૌ,તા. ૧૭ :પહેલો સંબંધી પાડોશી એ કહેવત તો તમે સાંભળી જ હશે. પણ પાડોશમાં રહેતાં અનેક ઝઘડાઓનું ઘર થાય છે. અને તેમાં પણ જો કચરો ફેંકવા મામલે ઝઘડો થયો હોય તો, તે લાંબો સમય સુધી ચાલે છે. પણ ઉત્ત્।ર પ્રદેશમાં કચરો ફેંકવાની બાબતે ઝઘડો થતાં ઈંટ મારીને મહિલાનું માથું ફોડી દીધું હતું. જેને કારણે ઘટનાસ્થળે જ મહિલાનું મોત નિપજયું છે. ઘટનાની જાણ થતાં આરોપીઓને ઝડપી પાડવા માટે પોલીસે ચક્રો ગતિમાન કર્યાં છે. આ કિસ્સાએ સમગ્ર પંથકમાં ભારે ચકચાર જગાવી છે.

ઘટનાની વિગતમાં વાત કરીએ તો, ઉત્ત્।ર પ્રદેશના મહારાજગંજ જિલ્લાના નિચલૌલમાં આવેલ ખોન્હૌલી ગામમાં બે પાડોશી વચ્ચે કચરો ફેંકવા મામલે વિવાદ ચાલી રહ્યો હતો. અને તેમાં પણ અનેક દિવસોથી ૫૦ વર્ષીય વિધાંતિ દેવીના ઘરે પાડોશમાં રહેતાં પરિવાર દ્વારા કચરો જબરદસ્તી કચરો ફેંકવામાં આવતો હતો. આ મામલે વિધાંતિ દેવીએ અનેક વખત પાડોશીઓને ટકોર કરી હતી. અને આ મામલે ઝઘડાઓ પણ થયા હતા.પણ તેવામાં આજ રોજ વિધાંતિ દેવીએ કચરો ફેંકવા મામલે પાડોશીઓને ફરિયાદ કરી હતી. જે બાદ ક્રોધે ભરાયેલાં પાડોશીઓ વિધાંતિ દેવી પર તૂટી પડ્યા હતા. અને તેમાંથી એક વિધાંતિ દેવીના માથા પર ઈંટ મારી દીધી હતી. જે કારણે લોહીલુહાણ હાલતમાં વિધાંતિ દેવી ત્યાં જ ઢળી પડ્યા હતા અને દમ તોડ્યો હતો.

કચરો ફેંકવા જેવી બાબતે એક મહિલાનું મોત નિપજતાં સમગ્ર ગામમાં હાહાકાર મચી ગયો હતો. અને તાત્કાલિક પોલીસ પણ ઘટનાસ્થળે આવીને તપાસ શરૂ કરી દીધી હતી. અને મૃતકના પરિવારને પોલીસે આશ્વાસન આપ્યું કે, તે ટૂંક સમયમાં જ આરોપીઓને દબોચી લેશે. જો કે, કચરો ફેંકવાની બાબતે એક મહિલાને જીવ ગુમાવવાનો વારો આવતાં સમગ્ર પંથકમાં ચકચાર મચી જવા પામી હતી.