Gujarati News

વર્ધા , તા.૧૭ : સાત વર્ષની બાળકી પરી પોતાના ઘરમાં સૂઈ રહી હતી ત્યારે તેને ખબર પણ નહોતી કે રાતના અંધારામાં તેને પોતાની જિંદગીની સૌથી મોટી આફતનો સામનો કરવાનો થશે. રાત્રે લગભગ પોણા બાર વાગ્યે અચાનક પરીની દાદીની ઊંઘ ઉડી, તેમણે જોયું કે પરીના ગળામાં એક કાળોતરો સાપ લપેટાયેલો હતો. આ દ્રશ્ય જોઈને જ જાણે તેમના શ્વાસ થંભી ગયા, અને તેઓ ત્યાં જ ચક્કર ખાઈને પડી ગયા. પરીના પિતાએ સ્થિતિની ગંભીરતા જોઈ દીકરીને જરાય હલનચલન કર્યા વિના ચૂપચાપ સૂઈ રહેવા જણાવ્યું. તેમને એમ હતું કે થોડીવારમાં કદાચ સાપ તેની જાતે જ જતો રહેશે.

એક તરફ ગળામાં વીંટળાયેલા સાપ સાથે પરી પથારીમાં પડી હતી, તો બીજી તરફ આસપાસના લોકોને આ અંગે ખબર પડી જતાં તેના ઘરમાં લોકોનું ટોળું જમા થઈ ગયું હતું. લોકો સાપના ફોટા અને વિડીયો લઈ રહ્યા હતા. આ દરમિયાન બે કલાકની મથામણ બાદ કોઈને સાપ પકડનારાનો ફોન નંબર મળ્યો. આખરે રાત્રે પોણા બે વાગ્યે સાપ પકડનારો પરીના ઘરે પહોંચ્યો. વર્ધા જિલ્લાના સેલુ તાલુકાના બોરખેડી ગામમાં બનેલી આ ઘટનામાં સ્નેક કેચર આવતા જ બધાને એમ હતું કે હવે પરી બચી જશે. જોકે, કુદરતને કંઈક અલગ જ મંજૂર હતું.

સ્નેક કેચર સાપને પકડવા માટે પ્રયાસ કરી રહ્યો હતો ત્યારે જ સાપે પરીને ડાબા હાથે કોણીની પાસે ડંખ મારી લીધો. આ દરમિયાન અચાનક જ હોબાળો થઈ જતાં આસપાસના લોકો છોકરીને બચાવવા દોડી ગયા, અને તે દરમિયાન સાપ ક્યાંક ગાયબ થઈ ગયો. છોકરીને સાપના ઝેરની કોઈ ગંભીર અસર ના થાય તે માટે તેને તાત્કાલિક સેવાગ્રામની કસ્તુરબા હોસ્પિટલમાં ખસેડવામાં આવી હતી. છોકરીની ટ્રીટમેન્ટ શરુ કરતા પહેલા તેને ઝેરી સાપ જ કરડ્યો છે કે કેમ તેની ડૉક્ટરે પહેલા ખાતરી કરી હતી. કારણકે જો સાપ ઝેરી હતો કે નહીં તેની ખાતરી કર્યા વિના જ દવા આપી દેવાય તો તેની ગંભીર આડઅસર થતી હોય છે.

સાપના ડંખ બાદ છોકરીનો ડાબો હાથ સૂઝી ગયો હતો. તેનો કલર પણ બદલાવવા લાગ્યો હતો. ડૉક્ટરોએ તેની ટ્રીટમેન્ટ તરત જ શરુ કરી દીધી હતી. શુક્રવારે તેના હાથ પર સર્જરી પણ કરવામાં આવશે.

 હોસ્પિટલના પિડિયાટ્રિક વોર્ડના ડૉ. મનીષ જૈનના જણાવ્યા અનુસાર, સાપના ઝેરથી કેટલું ડેમેજ થયું છે તેનો સ્પષ્ટ ખ્યાલ બે દિવસ બાદ આવતો હોય છે. હાલ છોકરી ખતરાની બહાર છે, અને ઝડપથી રિકવર થઈ રહી છે. તેમણે એમ પણ જણાવ્યું હતું કે, ગ્રામ્ય વિસ્તારમાં રહેતા લોકોએ જમીન પર સૂવાનું ટાળવું જોઈએ, ખાસ કરીને ચોમાસામાં વરસાદને કારણે સાપ નીકળવાનું પ્રમાણ વધી જતું હોય છે, ત્યારે પલંગ કે ખાટલામાં જ ઊંઘવું જોઈએ.