Gujarati News

નવી દિલ્હી, તા.૧૭: ઉત્તર પ્રદેશમાં વિધાનસભાની ચૂંટણી આવી રહી છે. સપા, બસપા અને કોંગ્રેસ સતત ભાજપ પર નિશાન સાધી રહી છે. તો ત્યાં જ મુખ્યમંત્રી યોગી આદિત્યનાથ પીએમ મોદીની સાથે તેમના વિકાસના કામો જનતા સમક્ષ ગણાવવામાં વ્યસ્ત છે. જો કે કોની સરકાર બનશે તે તો ચૂંટણી બાદ જ નક્કી થશે. પરંતુ  પોલ પરથી કેટલીક બાબતો સ્પષ્ટ જણાય છે.

મંગળવારે આવેલા ટાઈમ્સ નાઉ-પોલસ્ટ્રેટ ઓપિનિયન પોલમાં ભાજપ ફરી સત્તામાં આવી શકે છે. જો કે સીટોના   હિસાબે ભાજપને મોટું નુકસાન થશે. ૨૦૧૭ના વિધાનસભા ચૂંટણીમાં ૩૧૨ બેઠકો જીતનાર ભાજપને ૨૦૨૨ના વિધાનસભા ચૂંટણીમાં માત્ર ૨૩૯-૨૪૫ બેઠકો મળવાની સંભાવના છે. આટલી બધી બેઠકો સાથે ભાજપ પૂર્ણ બહુમતની સરકાર બનાવવામાં સફળ થઈ શકે છે. ૪૦૩ બેઠકોની વિધાનસભામાં બહુમતી માટે ૨૦૨ બેઠકો હોવી જરૂરી છે.

સમાજવાદી પાર્ટી (SP) ૧૧૯-૧૨૫ બેઠકો સાથે બીજા સ્થાને રહી શકે છે. ૨૦૧૭ના સરખામણીમાં એસપી માટે આ એક ધાર હશે. ૨૦૧૭માં તેને માત્ર ૪૭ બેઠકો મળી હતી. જયારે બસપાને માત્ર ૧૯ બેઠકો મળી હતી. ઓપિનિયન પોલ અનુસાર બહુજન સમાજ પાર્ટી (BSP) ૨૮-૩૨ સીટો વચ્ચે જીત મેળવી શકે છે. પ્રિયંકા ગાંધી વાડ્રાના પ્રયાસો છતાં, કોંગ્રેસ ૨૦૨૨ની ઉત્ત્।ર પ્રદેશ વિધાનસભા ચૂંટણીમાં યુપીના મતદારોને પ્રભાવિત કરવામાં સફળ થતી જણાતી નથી.

બુંદેલખંડ પ્રદેશમાં કુલ ૧૯ બેઠકો છે, જેમાંથી ભાજપને ૧૫-૧૭ બેઠકો મળવાની ધારણા છે. સપાને ૦-૧ સીટથી સંતોષ માનવો પડી શકે છે. બસપાને ૨-૫ બેઠકો મળી શકે છે, જયારે કોંગ્રેસ પાર્ટીને માત્ર ૧-૨ બેઠકો મળી શકે છે. દોઆબ ક્ષેત્રમાં ભાજપ કુલ ૭૧ બેઠકોમાંથી ૩૭-૪૦ બેઠકો કબજે કરે તેવું અનુમાન છે. સમાજવાદી પાર્ટીને ૨૬-૨૮ બેઠકો મળી શકે છે, ત્યારબાદ BSPના ૪-૬ બેઠકો મળી શકે છે. બીજી તરફ કોંગ્રેસને માત્ર ૦-૨ બેઠકોથી સંતોષ માનવો પડી શકે છે.

પૂર્વાંચલની ૯૨ બેઠકોમાંથી ભાજપને ૪૭-૫૦ બેઠકો મળી શકે છે, જયારે પૂર્વાંચલમાં સપાને ૩૧-૩૫ બેઠકો મળી શકે છે. પશ્ચિમ ઉત્તર પ્રદેશમાં ભાજપને ૪૦-૪૨ બેઠકો, SPની ૨૧-૨૪ બેઠકો વચ્ચે, BSPની ૨-૩ બેઠકો વચ્ચે જીત મળે તેવી શકયતા છે. અવધમાં ૧૦૧ સીટો પર સમાજવાદી પાર્ટી (SP) અને BJP વચ્ચે મુકાબલો છે. સર્વેમાં ભાજપને ૬૯-૭૨, સપાને ૨૩-૨૬ અને બસપાને ૭-૧૦ બેઠકો મળી છે. ગત વિધાનસભા ચૂંટણીમાં ભાજપને ૮૪ બેઠકો મળી હતી. બીજી તરફ સપાને માત્ર છ બેઠકો મળી છે.

તાજેતરમાં ABP-Cvoterનો સર્વે આવ્યો હતો. આ સર્વેના પરિણામોમાં પણ ભાજપ ઉત્ત્।ર પ્રદેશમાં ફરી સત્તામાં આવી શકે છે. તે જ સમયે, સપા અને તેના ગઠબંધન ભાગીદારો બીજા સ્થાને આવી શકે છે. આ સર્વેમાં ભાજપને ૨૧૩-૨૨૧, સપાને ૧૫૨-૧૬૦, બસપાને ૧૬-૨૦, કોંગ્રેસને ૬-૧૦ અને અન્યને ૨-૬ બેઠકો મળી છે.