Gujarati News

નવી દિલ્‍હી, તા.૧૮: આ વખતે બજેટમાં નોકરિયાત લોકો માટે સારા સમાચાર આવી શકે છે. સરકાર નવી ડાયરેક્‍ટ ટેક્‍સ સિસ્‍ટમ હેઠળ ટેક્‍સના દર ઘટાડવા પર વિચાર કરી રહી છે. જો આ મંજૂર થાય છે, તો ૧ ફેબ્રુઆરીએ રજૂ થનારા સામાન્‍ય બજેટમાં ટેક્‍સ સ્‍લેબમાં ફેરફારની દરખાસ્‍ત કરવામાં આવી શકે છે.

સીએનબીસી-ટીવી૧૮ના અહેવાલ મુજબ, નવા પ્રત્‍યક્ષ કર પ્રણાલીને આકર્ષક બનાવવા માટે આ કરવામાં આવી શકે છે. જો કે આ મામલે અંતિમ નિર્ણય વડા-ધાન કાર્યાલય દ્વારા લેવામાં આવશે.

રિપોર્ટ અનુસાર, નાણા મંત્રાલય નવા શાસન હેઠળ ટેક્‍સ રેટ ઘટાડીને ૩૦ ટકા અને ૨૫ ટકા કરી શકે છે. રિપોર્ટમાં એવું પણ કહેવામાં આવ્‍યું છે કે નાણા મંત્રાલયનો ઉદ્દેશ્‍ય લોકોને કોઈ પણ પ્રકારની છૂટ વિના ધીમે-ધીમે ટેક્‍સ વ્‍યવસ્‍થામાં શિફ્‌ટ કરવાનો છે.

અગાઉ, EAC-PMના અધ્‍યક્ષ બિબેક દેબરોયે નવેમ્‍બરમાં ભારપૂર્વક જણાવ્‍યું હતું કે કરદાતાઓને નવી કર વ્‍યવસ્‍થામાં સ્‍થાનાંતરિત કરવું જરૂરી છે.

કર અનુપાલનને સરળ બનાવવા માટે ૨૦૨૦ માં નવી કર વ્‍યવસ્‍થા રજૂ કરવામાં આવી હતી. તે વાર્ષિક આવક પર નીચા ટેક્‍સ દર ઓફર કરે છે.

હાલમાં દેશમાં દર વર્ષે ઓછામાં ઓછી ૫ લાખ રૂપિયાની આવક પર આવકવેરો વસૂલવામાં આવે છે. નવી સ્‍કીમમાં ૫ લાખથી ૭.૫૦ લાખ રૂપિયાની આવક પર ૧૦ ટકા ટેક્‍સ લાગે છે, જ્‍યારે જૂના શાસનમાં ૨૦ ટકા ટેક્‍સ લાગતો હતો. જ્‍યારે ૧૫ લાખ રૂપિયા સુધીની વાર્ષિક આવક પર ૩૦ ટકા ટેક્‍સ લાગે છે.