Gujarati News

ભોપાલ,તા. ૧૮: પબ્જી રમવાને કારણે બાળકોના દિમાગ પર ખરાબ અસર પડી રહી છે. જેનો એક ચોંકાવનારો કિસ્સો સામે આવ્યો છે. મધ્ય પ્રદેશના સાગર જિલ્લામાં એક બાળક સતત પબ્જી અને ફ્રી ફાયર ગેમ રમી રહ્યો હતો. અને જેને કારણે તેનું દિમાગ ખરાબ થઈ જતાં તેને હોસ્પિટલમાં દાખલ કરવાનો વારો આવ્યો છે. આ બાળક ઊંઘમાં પણ પબ્જી ગેમ વિશે જ વાતો કરી રહ્યો છે. ઉલ્લેખનીય છે કે, અગાઉ પણ પબ્જીને કારણે દિમાગ ખરાબ થયા હોવાના સમાચાર સામે આવ્યા હતા.

આજના યુવાનો પબ્જી રમવા પાછળ એકદમ ઘેલાં બની ગયા છે. અને દિવસ રાત તેઓ પબ્જી જ રમ્યા કરે છે. એટલું જ નહીં બાળકોના હાથમાં પણ હવે સ્માર્ટફોન આપી દેવામાં આવતાં તેઓ ઓનલાઈન અભ્યાસના બદલે દિવસ રાત પબ્જી જ રમે છે, જેને કારણે તેઓનો અભ્યાસ તો બગડે જ છે, પણ સાથે સાથે તેમનું દિમાગ પણ ખરાબ થઈ જાય છે. મધ્ય પ્રદેશના સાગર જિલ્લામાં આવી જ રીતે દિવસ રાત પબ્જી રમતાં બાળકની માનસિક સ્થિતિ બગડતાં તેને હોસ્પિટલમાં દાખલ કરવામાં આવ્યો છે.

બાળકના પરિવારજનોનું કહેવું છે કે, બાળક દિવસ રાત મોબાઈલ પર પબ્જી અને ફ્રી ફાયર જેવી ગેમ રમતો હતો. જેના કારણે તેનું દિમાગ ખરાબ થઈ ગયું હતું. હાલ બાળકની હોસ્પિટલમાં સારવાર ચાલી રહી છે. તેની સારવાર કરી રહેલ ડોકટર વિક્રાંત ગુપ્તાએ જણાવ્યું કે, તેને દરેક જગ્યાએ ગેમ જ દેખાઈ રહી છે. પરિવારજનોએ જણાવ્યું કે, કોલ્ડ ડ્રિન્કની બોટલ જોઈને બાળક વારંવાર કહી રહ્યો છે કે, આનું કાંઈ કામ નથી, તેનાથી ગેમ ચાલતી નથી. બાળકની માનસિક હાલત બગડી જતાં પરિવારજનો સતત રડી રહ્યા છે, અને તેને કારણે તેમની હાલત પણ ખરાબ થઈ રહી છે.

બાળકની સ્થિતિ એટલી વિકટ છે કે, તે બરાબર ઊંઘી પણ શકતો નથી અને ઊંઘમાં પણ તે ગભરાઈને ગેમ વિશે બોલ બોલ કરી રહ્યો છે. બાળકના પિતા રમેશ લોહગઢિયાએ જણાવ્યું કે, તેને પબ્જી અને ફ્રી ફાયર રમવાની આદત હતી, જેના કારણે તેનું દિમાગ ખરાબ થઈ ગયું છે. તેને દરેક વસ્તુમાં ગેમ જ દેખાઈ છે. હવે અમે તેને ગેમ રમવા નહીં દઈએ. સામુહિક સારવાર કેન્દ્રમાં બાળકની સારવાર ચાલી રહી છે.