Gujarati News

Gujarati News

News of Wednesday, 19th May 2021

ઈઝરાયલના હુમલામાં માતાનું મોત, કૂખમાં રહેલ શિશુનો બચાવ

રામ રાખે તેને કોણ ચાખે કહેવત સાર્થક થઈ : ઈઝરાયલ અને પેલેસ્ટાઈનના ઉગ્રવાદી જૂથ હમાસ વચ્ચેની લડાઈમાં અનેક માસુમોએ જીવ ગુમાવ્યા

ગાઝા સિટી, તા. ૧૯ : ઈઝરાયલ અને પેલેસ્ટાઈનના ઉગ્રવાદી જૂથ હમાસ વચ્ચે ચાલી રહેલી લડાઈમાં કેટલાય માસૂમ લોકોને જીવ ગુમાવવો પડ્યો છે. આ બંને વચ્ચેની લડાઈ દિવસેને દિવસે વધુ ઉગ્ર બનતી જઈ રહી છે. દરમિયાનમાં ગાઝામાં હચમચાવી નાંખે તેવી એક ઘટના સામે આવી છે. અહીં ઈઝરાયલના હુમલામાં એક મહિલા સહિત તેના ચાર બાળકોના મોત થઈ ગયા, પરંતુ ૫ મહિનાના બાળક બચી ગયું. આ બાળક માતાની બાથમાં હેમખેમ મળી આવ્યું.

આ બાળકના પિતા મોહમ્મદ અલ હદીદીએ જણાવ્યું કે, ગત શુક્રવારે તેની પત્ની અને તેના પાંચ બાળકો ઈદની ઉજવણી કરવા પોતાના મામાના ઘરે ગયા હતા દરમિયાન હદીદીના સાળાએ તેમને શુક્રવારે ત્યાં જ રોકાઈ જવા કહ્યું. હદીદી તો ત્યાં ન રોકાયો પણ તેની પત્ની અને બાળકો ત્યાં રોકાઈ ગયા હતા.

હદીદી પોતાના ઘરે જઈને સૂઈ ગયો હતો. રાત્રે તેણે બોંબ વિસ્ફોટો અવાજ સાંભળ્યો. તે જાગ્યો અને બહાર આવ્યો તો પાડોશીએ જણાવ્યું કે, તેના સાળાના ઘર પર ઈઝરાયલની મિસાઈલ આવીને પડી છે. તે તાત્કાલિક પોતાના સાળાના ઘરે પહોંચ્યો. ત્યાં તેણે જોયું કે, બધું જ નષ્ટ થઈ ગયું છે અને બચાવકર્મીઓ કાટમાળમાંથી લાશો બહાર કાઢી રહ્યા છે.

આ હુમલામાં હદીદીની પત્ની માહા અબુ હતાબ અને તેના ચાર બાળકો- સુહૈબ (૧૩ વર્ષ), યાહયા (૧૧ વર્ષ), અબ્દર્રહમાન (૮ વર્ષ) અને ઓસામા (૬ વર્ષ)નું મોત થયું હતું. તેમજ તેની સાળી અને તેના ચાર બાળકોના પણ મોત થયા હતા.

આ બધાની વચ્ચે એક ચમત્કાર થયો હોય તેમ હદીદીનો ૫ મહિનાનો દીકરો ઉમર હેમખેમ મળી આવ્યો હતો. બચાવકર્મીઓને તે તેની માતાની બાથમાં ભીડેલો મળી આવ્યો હતો. ઈઝરાયલનો હુમલો થયો એ સમયે તેની માતાએ ઉમરને બચાવવા તેને બાથમાં લઈ લીધો હશે. હુમલામાં માતાનું તો મોત થઈ ગયું, પણ માસૂમ ઉમર બચી ગયો.

ઉમરને ગાઝાની હોસ્પિટલમાં લઈ જવાયો છે. તેના ચહેરા પર ઉઝરડાના નિશાન છે. તેના પગમાં ફ્રેક્ચર થયું છે. હદીદીએ કહ્યું કે, ઉમર સિવાય હવે તેનું કોઈ બચ્યું નથી. તેણે કહ્યું કે, તે હવે એકલા હાથે જ ઉમરને મોટો કરશે.

(8:54 pm IST)