Gujarati News

નવી દિલ્હી : કોરોના સામેની લડાઈમાં વેક્સીન મુખ્ય હથિયાર તરીકે ઉપયોગમાં આવી રહી છે ત્યારે અમેરિકાએ હવે કોરોના જેવા ખતરનાક વાયરસ સામે એન્ટી વાયરલ ટેબલેટ વિકસાવવાનું કામ કરી રહ્યાં છે. આ માટે અમેરિકા 23000 કરોડ રૂપિયાનુ રોકાણ કરશે.

વ્હાઈટ હાઉસના મેડિકલ એડવાઈઝર ડો.એન્થની ફૌસીએ આની જાહેરાત કરતા કહ્યુ હતુ કે, કોરોના વાયરસ જેવા ખતરનાક વાયરસની સામે લડવા માટે આ પ્રકારની દવા ડેવલપ કરવાનુ અભિયાન શરૂ કરાશે. જેનો ઉપયોગ સંક્રમણની અસર સાવ ઓછી કરવા માટે કરાશે. હાલમાં તો આ દવાઓ બનાવવાની કામગીરી પહેલા તબક્કામાં છે પણ એક વખત ક્લિનિકલ ટ્રાયલ પૂરી થશે તે પછી આ દવા ડિસેમ્બર સુધીમાં દુનિયાની સામે હશે.

તેમણે કહ્યુ હતુ કે, નાણાકીય રોકાણના કારણે તેના રિસર્ચને વધઆરે વેગ મળશે. હાલમાં તો મહામારી સામે લડવા માટે આપણી પાસે હાલમાં તો કેટલાક વિકલ્પો છે પણ સ્પષ્ટ રીતે વેક્સીન જ તેના કેન્દ્ર સ્થાને છે.

 અત્રે ઉલ્લેખનીય છે કે, અમેરિકાએ ગયા વર્ષે રેકોર્ડ સમયમાં 18 અબજ ડોલરના ખર્ચે કોરોના સામે લડવા માટે પાંચ વેક્સીન તૈયાર કરી હતી. એ પછી અમેરિકા એન્ટી વાયરલ ટેબલેટ બનાવવામાં ધ્યાન આપી રહ્યુ છે. જે કોરોનાને પ્રાથમિક તબક્કામાં જ ખતમ કરી દેશે.

અમેરિકન સરકાર પણ કહી ચુકી છે કે જો આ દવા બન્યા બાદ તેના ઈમરજન્સી ઉપયોગ માટે મંજૂરી આપશે તો સરકાર તેના 15 લાખ ડોઝ પહેલા જ ખરીદવા માટે તૈયાર છે. આ દવા અમેરિકન કંપની મર્ક દ્વારા બનાવાઈ રહી છે. તેની 19000 લોકો પર હાલમાં ક્લિનિકલ ટ્રાયલ પણ ચાલી રહી છે.