Gujarati News

નવી દિલ્હી,તા.૧૯ : તાજેતરમાં જ સુરક્ષા કારણોસર ન્યુઝીલેન્ડની ક્રિકેટ ટીમે પાકિસ્તાન ટૂર કેન્સલ કરી દીધી છે. ઉલ્લેખનીય છે કે ન્યુઝીલેન્ડ અને પાકિસ્તાન વચ્ચે શુક્રવારના રોજ રાવલપિંડીમાં ત્રણ મેચની વનડે સીરિઝની પ્રથમ મેચ રમાવવાની હતી. પરંતુ ન્યુઝીલેન્ડની ટીમે મેચ પહેલા રમવાથી ઈનકાર કરી દીધો. રાવલપિંડી પછી લાહોરમાં બન્ને ટીમ વચ્ચે ટી-૨૦ સીરિઝ આયોજિત હતી. ન્યુઝીલેન્ડે રમવાથી ઈનકાર કરી દેતા પાકિસ્તાન સહિત દુનિયાભરના ક્રિકેટર્સ આ બાબતે પોતાની પ્રતિક્રિયા આપી રહ્યા છે. પાકિસ્તાનના ક્રિકેટર્સ અને બોર્ડ દ્વારા આ બાબતે નારાજગી વ્યક્ત કરવામાં આવી છે. આ દરમિયાન વેસ્ટ ઈન્ડિઝના બેટ્સમેન ક્રિસ ગેલની એક ટ્વિટને કારણે સોશિયલ મીડિયા પર હલચલ મચી ગઈ છે. 

            ગેલે રવિવારના રોજ પોતાના ઓફિશિયલ ટ્વિટર અકાઉન્ટ પર એક પોસ્ટ શેર કરી છે. તેણે લખ્યું છે, હું કાલે પાકિસ્તાન જઈ રહ્યો છું. મારી સાથે કોણ આવશે? ક્રિસ ગેલની આ ટ્વિટને ઘણી પ્રતિક્રિયાઓ મળી રહી છે. અમુક ફેન્સને પ્રશ્ન થઈ રહ્યો છે કે, ક્રિસ ગેલ આઈપીએલ ૨૦૨૧ની બીજી ઈનિંગમાં ભાગ લેશે કે નહીં? ઘણાં લોકોને લાગી રહ્યું છે કે, ક્રિસ ગેલ પાકિસ્તાન જવા બાબતે મજાક કરી રહ્યો છે. જો કે, ક્રિસ ગેલ ખરેખર પાકિસ્તાન જવાનો છે કે તેણે માત્ર મજાક અથવા તો કટાક્ષમાં આ ટ્વિટ કરી છે. એક યુઝરે અજય દેવગનની ફિલ્મ ફૂલ ઔર કાંટેનું મીમ શેર કરીને કહ્યું કે, ક્રિસ ગેલ એક જ સમયે યુએઈમાં આઈપીએલ રમી રહ્યો છે અને પાકિસ્તાન પણ જઈ રહ્યો છે.

            પાકિસ્તાની યુઝરે આ ટ્વિટ પર પ્રતિક્રિયા આપતા કહ્યું કે, ભાઈ અમે આ બાબતે અત્યારે ઘણાં સંવેદનશીલ છીએ. આશા છે કે આ અમારી સાથે કોઈ પ્રેક્ન નહીં હોય. ઉલ્લેખનીય છે કે સુરક્ષા કારણોસર ન્યુઝીલેન્ડે પ્રવાસ રદ્દ કર્યા પછી ઈંગ્લેન્ડ ક્રિકેટ બોર્ડ પણ પોતાના પાકિસ્તાન પ્રવાસ પર વિચાર કરી રહ્યું છે. ઈંગ્લેન્ડ ક્રિકેટ બોર્ડ પાકિસ્તાનમાં હાજર સુરક્ષા ટીમની મદદથી નક્કી કરશે કે ઈંગ્લેન્ડ ટીમનું પાકિસ્તાન જવું સુરક્ષિત છે કે નહીં. ઈસીબીએ પોતાના નિવેદનમાં જણાવ્યું કે, અમે સ્થિતિને સંપૂર્ણપણે સમજવા માટે અમારી સુરક્ષા ટીમ સાથે સંપર્ક કરી રહ્યા છીએ.