Gujarati News

નવી દિલ્‍હીઃ મોંઘવારી સામે ઝઝૂમી રહેલા સામાન્‍ય માણસ માટે કોઈ સારા સમાચાર નથી. સાબુ, ટૂથપેસ્‍ટ અને શેમ્‍પૂ જેવી દૈનિક ઉપયોગની વસ્‍તુઓની કિંમત વધી શકે છે. રિન - લક્‍સ - લાઇફબોય - ફેયર એન્‍ડ લવલી - ચા - હોર્લિકસ - ટુથપેસ્‍ટ - શેમ્‍પૂ  જેવી અનેક ઉપભોક્‍તા ચીજવસ્‍તુઓનું ઉત્‍પાદન કરતી અગ્રણી કંપની હિન્‍દુસ્‍તાન યુનિલિવર લિમિટેડ તેના ઉત્‍પાદનોની કિંમતમાં વધારો કરી શકે છે. કંપનીએ કહ્યું કે તેની પેરેન્‍ટ કંપની યુનિલિવર પીએલસીએ રોયલ્‍ટી ફીમાં ૮૦ બેસિસ પોઈન્‍ટનો વધારો કર્યો છે. આ વધારો ત્રણ વર્ષમાં તબક્કાવાર લાગુ કરવામાં આવશે. યુનિલિવરે દસ વર્ષમાં પ્રથમ વખત રોયલ્‍ટી ફીમાં વધારો કર્યો છે. આ પહેલા કંપનીએ વર્ષ ૨૦૧૩માં તેમાં વધારો કર્યો હતો.

HULએ જણાવ્‍યું હતું કે નવા કરાર મુજબ રોયલ્‍ટી અને કેન્‍દ્રીય સેવાઓની ફી વધારીને ૩.૪૫ ટકા કરવામાં આવી છે. ગયા નાણાકીય વર્ષમાં તે ૨.૬૫ ટકા હતો. ગયા નાણાકીય વર્ષમાં HULની આવક રૂ. ૫૧,૧૯૩ કરોડ હતી, જે એક વર્ષ અગાઉની સરખામણીએ ૧૧.૩ ટકા વધુ છે. તેમાંથી, કંપનીએ તેની મૂળ કંપનીને ૨.૬૫ ટકાની રોયલ્‍ટી ફી ચૂકવી હતી. રોયલ્‍ટી ફીમાં ૮૦ bpsનો વધારો ત્રણ તબક્કામાં લાગુ કરવામાં આવશે. આનાથી ફેબ્રુઆરીથી ડિસેમ્‍બર ૨૦૨૩ માટે HULની રોયલ્‍ટી ફીમાં ૪૫ bpsનો વધારો થશે. તેવી જ રીતે, તે ૨૦૨૪ માં ૨૫ bps અને ૨૦૨૫ માં ૧૦ ટકા વધશે.

HUL માટે આ નકારાત્‍મક માનવામાં આવે છે. તેનું કારણ એ છે કે કંપની હજુ સુધી વેચાણ અને વોલ્‍યુમમાં મજબૂત રિકવરી હાંસલ કરી શકી નથી. મોંઘવારીનો સામનો કરી રહેલા સામાન્‍ય લોકો મોંઘી વસ્‍તુઓ પર ખર્ચ કરવાથી દૂર રહી શકે છે. તેનાથી કંપનીની આવક પર અસર પડી શકે છે. ગુરુવારે, કંપનીનો શેર NSE પર ૧.૬ ટકાના ઘટાડા સાથે રૂ. ૨,૬૪૩.૦૫ પર બંધ થયો હતો. રોયલ્‍ટી કરાર HULને યુનિલિવરના ટ્રેડમાર્ક્‍સ, ટેક્‍નોલોજી, કોર્પોરેટ લોગોનો ઉપયોગ કરવાનો અધિકાર આપે છે. યુનિલિવર પીએલસી યુકે સ્‍થિત કંપની છે.

HUL પાસે ફૂડ, હોમકેર, પર્સનલ કેર અને વોટર પ્‍યુરીફાયર સહિતની ઘણી જાણીતી પ્રોડક્‍ટ્‍સ છે. તેમાં અન્નપૂર્ણા સોલ્‍ટ એન્‍ડ ફલોર, બ્રુ કોફી, બ્રુક બોન્‍ડ ટી, ફાર્મર્સ કેચઅપ, જયુસ અને જામ્‍સ, લિપ્‍ટન ટી, નોર સૂપ, ક્‍વોલિટી વોલ આઈસ્‍ક્રીમ, હોર્લિક્‍સ, વ્‍હીલ, રિન, સર્ફ એક્‍સેલ, વિમ, ક્‍લિનિક પ્‍લસ શેમ્‍પૂ, ડવ, લાઈફબુયનો સમાવેશ થાય છે. , ડેનિમ શેવિંગ ક્રિમમાં લેક્‍મે, લક્‍સ, પેપ્‍સોડેન્‍ટ, રેક્‍સોના, સનસિલ્‍ક અને પ્‍યુરાઈટનો સમાવેશ થાય છે.