Gujarati News

નવી દિલ્‍હીઃ આજે દેશના પૂર્વ વડાપ્રધાન અને કોંગ્રેસના દિવંગત નેતા રાજીવ ગાંધીની 78મી જન્મજયંતિ છે. આ પ્રસંગે રાહુલ ગાંધી અને પ્રિયંકા ગાંધીએ તેમના સ્મારક સ્થળ વીર ભૂમિ ખાતે તેમને શ્રદ્ધાંજલિ આપી હતી. આ દરમ્યાન કોંગ્રેસના નેતા કેસી વેણુગોપાલ, મલ્લિકાર્જુન ખડગે અને અન્ય નેતાઓ પણ હાજર હતા. આ તરફ વડાપ્રધાન નરેન્દ્ર મોદીએ પણ રાજીવ ગાંધીને તેમની જન્મજયંતિ પર શ્રદ્ધાંજલિ આપી હતી.

રાજીવ ગાંધીની જન્મજયંતિ પર રાહુલ ગાંધીએ તેમના પિતાને ખાસ રીતે યાદ કર્યા. તેમણે ટ્વિટર પર એક ઈમોશનલ વિડિયો શેર કર્યો અને લખ્યું, “પાપા, તમે દરેક ક્ષણે મારી સાથે છો, મારા દિલમાં. હું હંમેશા તમે દેશ માટે જે સપનું જોયું હતું તે પૂર્ણ કરવાનો પ્રયાસ કરીશ.”

આ સિવાય કોંગ્રેસે પોતાના ટ્વિટર હેન્ડલ પર લખ્યું, ‘અમે ભારતના પૂર્વ વડાપ્રધાન રાજીવ ગાંધીજીને તેમની જન્મજયંતિ પર સલામ કરીએ છીએ. 21મી સદીના ભારતના આર્કિટેક્ટ તરીકેનું તેમનું વિઝન હતું જેણે ભારતમાં IT અને ટેલિકોમ્યુનિકેશન ક્રાંતિની શરૂઆત કરી. આજે આપણે તેમનો વારસો ઉજવીએ છીએ. વડાપ્રધાન નરેન્દ્ર મોદીએ પણ રાજીવ ગાંધીને તેમની જન્મજયંતિ પર શ્રદ્ધાંજલિ આપી હતી. પીએમ મોદીએ પોતાના ટ્વિટર હેન્ડલ પર લખ્યું, હું દેશના પૂર્વ વડાપ્રધાન રાજીવ ગાંધીને તેમની જન્મજયંતિ પર શ્રદ્ધાંજલિ અર્પણ કરું છું.