Gujarati News

સહારનપુર તા. ૨૦ : ઉત્તર પ્રદેશના સહારનપુરમાં ડો.ભીમરાવ સ્‍પોર્ટ્‍સ સ્‍ટેડિયમમાં આયોજિત કબડ્ડી સ્‍પર્ધા દરમિયાન ખેલાડીઓને ટોયલેટની અંદર પકવેલો ખોરાક ખાવાની ફરજ પડી હતી. સહારનપુરના સ્‍પોર્ટ્‍સ ઓફિસર અનિમેષ સક્‍સેનાનો વીડિયો વાયરલ થયા બાદ તેને સસ્‍પેન્‍ડ કરવામાં આવ્‍યો છે. આ સાથે જિલ્લા મેજિસ્‍ટ્રેટે તપાસ ગોઠવી છે.

હકીકતમાં, સહારનપુરના ડો. ભીમરાવ સ્‍પોર્ટ્‍સ સ્‍ટેડિયમમાં સબ જુનિયર (ગર્લ્‍સ) કબડ્ડી સ્‍પર્ધાની ત્રણ દિવસીય ઇવેન્‍ટનું આયોજન કરવામાં આવ્‍યું હતું. આ રાજય કક્ષાની કબડ્ડી સ્‍પર્ધા ૧૬ સપ્‍ટેમ્‍બરથી ૧૮ સપ્‍ટેમ્‍બર સુધી ચાલી હતી, જેમાં ૧૭ ટીમોએ ભાગ લીધો હતો. એટલે કે ૨૦૦ થી વધુ લોકોની ટીમ આવી હતી. આ લોકોનું ભોજન શૌચાલયમાં તૈયાર કરવામાં આવતું હતું.

ખેલાડીઓને શૌચાલયમાં રાંધેલો ખોરાક ખવડાવવામાં આવ્‍યો હતો અને કાચા ચોખા પીરસવામાં આવ્‍યા હતા. આ અંગે સ્‍પોર્ટ્‍સ ઓફિસર અનિમેષ સક્‍સેનાએ જણાવ્‍યું કે જયારે ભોજન તૈયાર કરવામાં આવ્‍યું ત્‍યારે હલવાઈના ચોખા બગડી ગયા હતા, તે ચોખા ફેંકી દેવામાં આવ્‍યા હતા અને ફરીથી ચોખા બનાવવામાં આવ્‍યા હતા. જોકે, રમતગમત અધિકારીએ શૌચાલયમાં રાંધેલા ખોરાકને લઈને અલગ જ દલીલ કરી હતી.

રમતગમત અધિકારી અનિમેષ સક્‍સેનાએ જણાવ્‍યું હતું કે વરસાદના કારણે સ્‍વિમિંગ પૂલની બાજુમાં આવેલા ચેન્‍જિંગ રૂમમાં ખાદ્યપદાર્થો રાખવામાં આવ્‍યા હતા, કારણ કે સ્‍ટેડિયમની ચારે બાજુ બાંધકામ ચાલી રહ્યું છે, જેના કારણે અમે ચેન્‍જિંગ રૂમમાં ભોજન રાંધવાની વ્‍યવસ્‍થા કરી હતી. સ્‍વિમિંગ પૂલ.જયારે વાયરલ વીડિયોમાં જોઈ શકાય છે કે કેવી રીતે ટોઈલેટમાં ખોરાક બનાવવામાં આવી રહ્યો છે.

વીડિયો વાયરલ થયા બાદ સહારનપુર જિલ્લા મેજિસ્‍ટ્રેટ અખિલેશ સિંહે એડીએમ ફાયનાન્‍સ અને રેવન્‍યુ રજનીશ કુમાર મિશ્રાને તપાસ કરીને રિપોર્ટ સબમિટ કરવાનો નિર્દેશ આપ્‍યો છે. આ સાથે તેમણે કહ્યું કે, સ્‍પર્ધામાં ભાગ લેનાર ખેલાડીઓના મોબાઈલ નંબર પર આ મામલે વાત કરવી જોઈએ અને પુરાવા સાથે રિપોર્ટ રજૂ કરવો જોઈએ.

દરમિયાન, સહારનપુરના સ્‍પોર્ટ્‍સ ઓફિસર અનિમેષ સક્‍સેનાને સહારનપુરમાં યોજાયેલી ગર્લ્‍સ કબડ્ડી સ્‍પર્ધામાં ખેલાડીઓને બગડેલું ભોજન પીરસવા અને રસોડા તરીકે શૌચાલયનો ઉપયોગ કરવા બદલ રમત નિર્દેશાલય દ્વારા સસ્‍પેન્‍ડ કરવામાં આવ્‍યો છે.