Gujarati News

બેંગલુરુ, તા.૨૩ : મિકેનિકલ એન્જિનિયર યુવાને ઓનલાઈન ટ્રેડિંગમાં ૩૫ લાખ રૂપિયાનું રોકાણ કર્યું હતું. જો કે, તેણે જે એપ્લિકેશનમાં રોકેલાં યુવકના ૩૫ લાખ રૂપિયા ડૂબી ગયા હતા. ઘર, પરિવાર અને દોસ્તો પાસેથી નાણા ઉછીના લઈને તેણે એપમાં રોકાણ કર્યું હતું. જો કે, તેના માથા પર લાખો રૂપિયાનું દેવું થઈ જતાં યુવાને બેંક લૂંટવાનું નક્કી કર્યું હતું. જો કે, બેંટ લૂંટ્યા બાદ પોલીસના હાથે તે ઝડપાઈ ગયો હતો અને હવે તેને જેલના સળિયા ગણવાનો વારો આવ્યો છે.

૧૪ જાન્યુઆરીના રોજ યુવકે બેંગલુરુની માડિવાલામાં આવેલી એક બેંકમાં ચપ્પુની અણીએ લૂંટ કરી હતી અને તે તેમાં સફળ પણ થઈ ગયો હતો. તેણે બેંકમાંથી ૧.૮ કિલો સોનું અને ૩.૭ લાખ રૂપિયા કેશની લૂંટ ચલાવી હતી. જો કે, બેંક લૂંટ્યા બાદ પોલીસે તેને ઝડપી પાડ્યો હતો, અને લૂંટના મુદ્દામાલ સહિત તેની ધરપકડ કરી હતી. આરોપીનું નામ ધીરજ એસ છે, અને તે કામાક્ષીપાયલાનો રહેવાસી અને પ્રાઈવેટ કંપનીમાં જોબ કરે છે. પોલીસે જણાવ્યું કે તે તેના ભાઈ અને પિતા સાથે રહે છે અને દર મહિને ૩૦ હજાર રૂપિયા પગાર છે.

પોલીસે જણાવ્યું હતું કે, નવેમ્બર ૨૦૨૦માં તેણે એપ-બેઝ્ડ ટ્રેડિંગ પ્લેટફોર્મ ઉપર પોતાની બચતનું રોકાણ કરવાનું શરૂ કર્યું હતું. અને આ માટે તેણે પોતાના પરિવાર સહિત અમુક લોકો પાસેથી પૈસા ઉધાર લીધા હતા. જો કે, તેણે કરેલું લાખો રૂપિયાનું રોકાણ ડૂબી ગયું હતું અને તે દેવા હેઠળ દબાઈ ગયો હતો. અને ત્યારે તેને બેંક લૂંટવાનો વિચાર આવ્યો હતો.

પોલીસ ઓફિસરે જણાવ્યું કે, તેણે ઈન્ટરનેટ પર બેંક કેવી રીતે લૂંટવી તેના અંગે જાણકારી મેળવી હતી. જો કે તેના ધ્યાનમાં આવ્યું કે, લૂંટ ગેંગ દ્વારા જ કરવામાં આવે છે અને બાદમાં અમુક કિસ્સામાં પકડાઈ પણ જવાઈ છે. જેથી

પોલીસ પકડી ન શકે તે માટે તેણે એકલા જ બેંક લૂંટવાનું નક્કી કર્યું હતું. ધીરજે પોતાના ઘરથી દૂર આવેલી બેંકમાં લૂંટ કરવાનું નક્કી કર્યું હતું. જે બાદ તેણે દક્ષિણ બેંગલુરુની બેંકોની રેકી કરી હતી અને તેમાં માદિવાલામાં આવેલી એક બેંકને નક્કી કરી હતી. આ બેંક મેઈન રોડની પાસે આવેલી હતી અને ત્યાં કોઈ સિક્યુરિટી ગાર્ડ પણ ન હતો. જાન્યુઆરીના પ્રથમ અને બીજા અઠવાડિયામાં ધીરજે ચાર વખત આ બેંકની મુલાકાત લીધી હતી. અને તેણે મનમાં મેનેજરની ચેમ્બર, સ્ટ્રોંગરૂમ વગેરેની વિગતો નોંધી દીધી હતી. જાન્યુઆરી ૧૪ના રોજ તે સાંજ ૪ વાગ્યાની આસપાસ બેંક પાસે પહોંચ્યો હતો અને જ્યારે બેંક મેનેજર હરીશ અને કેશિયર મેઈન ડોરને લોક મારતા હતા તે સમયે તે ત્યાં આવ્યો હતો. ધીરજે મેનેજરની પાસે પહોંચીને પોતાના હાથમાં રહેલું ચપ્પુ બતાવીને મહિલા અને મેનેજરને ધમકાવી હતી. ડરી ગયેલાં બેંક મેનેજરે તાત્કાલિક બેંકનો મેઈન ડોરનું લોક ખોલી દીધું હતું. જે બાદ ધીરજ મેનેજરને સ્ટ્રોંગરૂમ પાસે લઈ ગયો હતો અને તેનો દરવાજો ખોલવા માટે બેંક મેનેજરને કહ્યું હતું. જે બાદ સ્ટ્રોંગરૂમના સેફમાંથી તેણે પૈસા અને સોનાની લૂંટ ચલાવી હતી. લૂંટ બાદ તે રીક્ષામાં બેસીને ભાગી ગયો હતો. અને આ સમગ્ર બેંક માત્ર ૨૦ મિનિટમાં લૂંટીને તે ફરાર થઈ ગયો હતો. ૫.૪૦ તે બેંકમાં પ્રવેશ્યો હતો અને ૬ વાગ્યે ત્યાંથી ભાગી ગયો હતો.

બેંક લૂંટની તપાસ કરી રહેલાં અધિકારીએ જણાવ્યું હતું કે, સીસીટીવીની મદદથી અમને ધીરજને ઝડપવામાં મદદ મળી હતી. બેંકની બહાર રીક્ષામાં બેસીને તે બનાશંકરી બસ ટર્મિનલ ગયો હતો અને ત્યાંથી મેજેસ્ટિકમાં કેએસટીઆરસીના બસ ટર્મિનલ પર ગયો હતો. જ્યાંથી તે ચીક્કામેંગુલુરુ જતી બસમાં બેઠો હતો. ચીક્કામેંગલુરુમાં તેણે થોડું સોનું છુપાવી દીધું હતું. અને ત્યાંથી શિવામોગ્ગા પહોંચ્યો હતો. અને ત્યાં બાકી બચેલું સોનું છુપાવીને તે પરત બેંગલુરુ પરત ફર્યો હતો અને ત્યાંથી આંધ્ર પ્રદેશના અનંતપુરમાં જતી બસમાં બેસી ગયો હતો. ત્યાં તેણે થોડું સોનું વેચી દીધું હતું અને બાદમાં બેંગલુરુ પરત ફર્યો હતો. તેણે આ પૈસાથી પોતાના ૬ દોસ્તોને ઉધારના પૈસા ચૂકવી દીધા હતા. અને વધુ સોનું વેચીને સાતમા દોસ્તને પૈસા ચૂકવે તે પહેલાં અમે તેને ઝડપી લીધો હતો.