Gujarati News

નવી દિલ્‍હી તા. ૨૩ : રાજધાની દિલ્‍હી અને NCRમાં આજે હવામાનનો ટ્રેન્‍ડ બદલાયો છે. જોરદાર વાવાઝોડાની સાથે વરસાદ પણ ચાલુ છે જેના કારણે ઘણું નુકસાન થયું છે. દરમિયાન હવામાન વિભાગે વરસાદનું નવું અપડેટ આપ્‍યું છે. જણાવવામાં આવ્‍યું છે કે દિવસભર હવામાનનો મિજાજ આવો જ રહી શકે છે.

દિલ્‍હી-NCRમાં સતત વરસાદ ચાલુ છે. કાળઝાળ ગરમી વચ્‍ચે હવામાનનો મિજાજ એકાએક બદલાયો છે. તેની શરૂઆત જોરદાર પવન અને વાવાઝોડા સાથે થઈ હતી, પરંતુ પછી મુશળધાર વરસાદે તાપમાનમાં ઘટાડો કર્યો હતો. આ સમયે દિલ્‍હી-એનસીઆરમાં વાતાવરણ ખુશનુમા બની ગયું છે પરંતુ કેટલીક સમસ્‍યાઓ પણ ઉભી થઈ છે. દિલ્‍હી-NCRમાં સવારથી વરસાદ અને જોરદાર વાવાઝોડાને કારણે દિલ્‍હી ફાયર વિભાગને વૃક્ષો તોડવાના ૧૦૦થી વધુ કોલ મળ્‍યા છે. પરંતુ કોઈ ક્‍યાંય ફસાયું ન હતું અને કોઈને ઈજા થઈ ન હતી.

ત્રણ જગ્‍યાએથી દિવાલ ધરાશાયી થવાના કોલ આવ્‍યા હતા, જેમાં મોતી નગર વિસ્‍તારમાં દિવાલ ધરાશાયી થવાથી ૩ લોકો ઘાયલ થયા હતા. ફાયર વિભાગનું કહેવું છે કે અમે સંપૂર્ણ રીતે એલર્ટ છીએ અને સતત કોલ એટેન્‍ડ કરી રહ્યા છીએ.

દિલ્‍હી-એનસીઆરમાં ભારે પવન સાથે વરસાદ બાદ શહેરના ઘણા ભાગોમાં રસ્‍તા પર પાણી ભરાઈ ગયા હતા. ગુરુગ્રામમાંથી પણ આવી તસવીરો સામે આવી છે. ગુરુગ્રામ ટ્રાફિક પોલીસે જણાવ્‍યું છે કે મેફિલ્‍ડ ગાર્ડન ચોકમાં ઘણો પાણી ભરાઈ ગયો છે.

દિલ્‍હીના મુંડકા વિસ્‍તારમાં, જોરદાર તોફાન અને વાવાઝોડાને કારણે એક નિર્માણાધીન મકાનની દિવાલ પડોશી ટેરેસ પર તૂટી પડી. જેના કારણે છત તૂટી ગઈ હતી. ઘરમાં હાજર લોકોનો આબાદ બચાવ થયો હતો.

હવામાન વિભાગ દ્વારા જણાવવામાં આવ્‍યું છે કે હવે થોડા કલાકો સુધી દિલ્‍હી-એનસીઆરમાં આવો જ વરસાદ ચાલુ રહેવાનો છે. પવન પણ ૬૦-૯૦ કિમી/કલાકની ઝડપે ફૂંકાશે. તેની અસર ગાઝિયાબાદ, ઈન્‍દિરાપુરમ, નોઈડા, ગુરુગ્રામમાં વધુ જોવા મળશે. કેટલીક જગ્‍યાએ તો હવામાનનો આ બદલાવ મુશ્‍કેલીનું કારણ પણ બન્‍યો છે. ભારે પવન અને ખતરનાક વાવાઝોડા વચ્‍ચે ઘણા વિસ્‍તારોમાં વૃક્ષો ધરાશાયી થયા છે. હવામાન વિભાગે આ માહિતી પણ આપી છે કે કેટલીક જગ્‍યાએ આંધી અને વરસાદને કારણે વિઝિબિલિટી ઘટી છે.

દિલ્‍હી એરપોર્ટે પણ એક નિવેદનમાં કહ્યું છે કે ખરાબ હવામાનને કારણે ફલાઈટ્‍સ પ્રભાવિત થઈ છે. મુસાફરોને તમામ એરલાઈન્‍સનો સંપર્ક કરવા કહેવામાં આવ્‍યું છે. જો કે દિલ્‍હી-એનસીઆરમાં હવામાનનો મૂડ બદલાયો છે, પરંતુ બિહાર, આસામ, કેરળ, કર્ણાટકમાં ઘણા દિવસો પહેલા ભારે વરસાદ થયો હતો. આસામમાં પૂર આવ્‍યું છે, બિહારમાં વીજળી પડવાથી અનેક લોકોના મોત થયા છે અને કર્ણાટકમાં ભારે જળબંબાકારની સ્‍થિતિ સર્જાઈ છે.