Gujarati News

ભોપાલ તા. ૨૩ : દેશભરમાં મહિલાઓ વિરુદ્ઘ વધી રહેલા ગુનાઓમાં અન્ય એક શરમજનક કેસનો ઉમેરો થયો છે. દૈનિક સ્તરે દેશમાં મહિલાઓ સાથે દુષ્કર્મ, હત્યા અને શારિરીક શોષણના વધી રહેલા કેસો વચ્ચે એસિડ એટેકના કેસોમાં પણ વધારો થયો છે. તાજેતરમાં સામે આવેલા કેસમાં છેડતીનો વિરોધ કરી રહેલી પીડિતાની આંખોમાં યુવકો દ્વારા એસિડ રેડવાની કથિત ઘટના સામે આવી છે.

આ કેસ મધ્ય પ્રદેશના પન્નામાંથી સામે આવ્યો છે જયાં છેડતીનો વિરોધ કરી રહેલી પીડિતાની આંખમાં બે યુવકોએ એસિડ રેડ્યું હતું. ગંભીર રીતે દાઝી ગયેલી પીડિતાને સ્થાનિક દવાખાને લઇ જવામાં આવી હતી. જે પછી નુકસાન પામેલી આંખોની સારવાર માટે અન્ય એક દવાખાને રિફર કરવામાં આવી હતી.

પન્નાના બરાહો ગામમાં બનેલી આ ઘટના સામે સ્થાનિકોમાં ભારે રોષ જાગી ઉઠ્યો છે. માહિતી મુજબ આરોપી યુવકોની ઘરેથી એક છોકરી ભાગી ગઇ છે અને તેમને શક હતો કે એને ભાગવામાં પીડિત યુવતીએ મદદ કરી છે. બીજી તરફ પીડિતાનું કહેવુ છે કે, ગામના બે યુવકો એને પકડીને લઇ ગયા અને ભાગી ગયેલી યુવતી વિશે પૂછપરછ કરવા લાગ્યા હતા. પીડિતાએ આ વિશે જાણ ના હોવાની વાત કહેતા યુવકોએ એની સાથે શારિરીક અડપલા કર્યા હતા, પરંતુ પીડિતાઓ એનો પ્રખર વિરોધ કર્યો હતો. જે પછી બંને યુવકોએ પીડિતાની આંખોમાં એસિડ રેડ્યું હતું. આ સિવાય આરોપી યુવકોએ પીડિતાના ભાઇની સાથે મારઝૂડ કરી હતી.

ઘટના સામે આવ્યા પછી સ્થાનિક પોલીસ સહિત કલેકટર પણ પીડિતાને મળવા માટે દવાખાને પહોંચ્યા હતા. તેમણે આરોપીઓ સામે સખત કાર્યવાહીનું આશ્વાસન આપ્યું હતું.

મહિલાઓ સામે વધી રહેલા ગુનાઓમાં અન્ય એક શરમજનક કેસ બનતાં ગામના લોકો ચિંતાતુર બન્યા છે. ગામના લોકોએ આરોપીઓ સામે કાર્યવાહીની માંગ કરી છે. તો બીજી તરફ આ ઘટનાને લીધે અધિકારીઓ ઉંચા-નીચા થઇ ગયા છે કારણ કે બે દિવસ પછી મધ્ય પ્રદેશના મુખ્યમંત્રી શિવરાજ સિંહ ચૌહાણ ગામની મુલાકાતે આવવાના છે.