Gujarati News

વોશીંગ્‍ટન,તા.૨૪: વડાપ્રધાન નરેન્‍દ્રભાઇ મોદીએ ગઇ કાલે અમેરિકાની રાજધાની વોશિંગ્‍ટન ડીસીમાં તેમના જાપાની સમકક્ષ યોશીહિદે સુગાસાથે મુલાકાત કરી. એશિયાની બે આર્થિક મહાસત્તાઓના નેતાઓ વચ્‍ચેની વાતચીતમાં ભારત-જાપાન સંબંધોવચ્‍ચે સહકારને પ્રોત્‍સાહન આપતા વિવિધ વિષયો પર ચર્ચા કરવામાં આવી હતી. આ દરમિયાન પીએમ મોદીએ જાપાનને સૌથી મહત્‍વપૂર્ણ ભાગીદાર ગણાવ્‍યું. ત્રણ દિવસની અમેરિકાની મુલાકાતે આવેલા પીએમ મોદીએ કહ્યું કે, ભારત અને જાપાન વચ્‍ચે મજબૂત મિત્રતા વિશ્વ માટે સારા સંકેત છે.
જાપાની સમકક્ષને મળ્‍યા બાદ વડાપ્રધાન નરેન્‍દ્રભાઇ મોદીએ ટ્‍વિટ કર્યું હતું કે, જાપાન ભારતના સૌથી મૂલ્‍યવાન ભાગીદારોમાંનું એક છે. વડા પ્રધાન યોશીહિદે સુગા સાથે મેં વિવિધ વિષયો પર ઉત્તમ બેઠક કરી હતી, જે આપણા દેશો વચ્‍ચે સહકારને વધુ પ્રોત્‍સાહન આપશે. એક મજબૂત ભારત-જાપાન મિત્રતા સમગ્ર વિશ્વ માટે સારી છે. વડા પ્રધાન મોદી અને તેમના જાપાની સમકક્ષ યોશીહિડે સુગા વોશિંગ્‍ટનમાં સફળ બેઠક કરી હતી. તેમાં, તેઓએ વેપાર અને સાંસ્‍કૃતિક સંબંધોને વધુ વેગ આપવાના માર્ગો સહિત અનેક મુદ્દાઓની ચર્ચા કરી.
વડાપ્રધાન કાર્યાલય (PMO) એ ટ્‍વિટ કરીને કહ્યું કે, ‘જાપાન સાથે મિત્રતા આગળ વધી રહી છે. વડા પ્રધાન નરેન્‍દ્રભાઇ મોદી અને યોશીહિડે સુગાએ વોશિંગ્‍ટન ડીસીમાં ફળદાયી બેઠક કરી હતી. બંને નેતાઓએ વ્‍યાપાર અને સાંસ્‍કૃતિક સંબંધોને વધુ વેગ આપવાના માર્ગો સહિત અનેક મુદ્દાઓની ચર્ચા કરી હતી. ગયા વર્ષે સપ્‍ટેમ્‍બરમાં શિન્‍ઝો આબેને બદલનારા યોશીહિડે સુગા સાથે પીએમ મોદીની આ પ્રથમ વ્‍યક્‍તિગત મુલાકાત પણ હતી. દ્વિપક્ષીય બેઠક ક્‍વાડના પ્રથમ વ્‍યક્‍તિગત સમિટ પહેલા આવે છે. ક્‍વાડમાં ઓસ્‍ટ્રેલિયા, ભારત, જાપાન અને યુ.એસ. તેનો હેતુ ચીનને સ્‍પર્ધા આપવાનો છે.