Gujarati News

બેંગ્‍લોર,તા.૨૪:બેંગલુરુમાં મહિલાઓની સુરક્ષાને લઈને વધુ એક ચોંકાવનારી ઘટના સામે આવી છે. મોડી રાત્રે દોસ્‍તના ઘરેથી કેબ દ્વારા ઘરે જઈ રહેલી યુવતીને કેબમાં ઊંઘ આવી ગઈ હતી. જે બાદ કેબ ડ્રાઈવરે તકનો લાભ ઉઠાવતાં યુવતીને સુમસામ જગ્‍યા પર લઈ ગયો હતો. અને સૂતેલી યુવતી સાથે સેલ્‍ફી લઈ તેની સાથે દુષ્‍કર્મ આચર્યું હતું. યુવતીની પોલીસ ફરિયાદ બાદ આરોપી કેબ ડ્રાઈવરને ઝડપી લેવામાં આવ્‍યો છે.
પોલીસ સુત્રોના જણાવ્‍યા અનુસાર, દોસ્‍તના ઘરે પાર્ટી કર્યા બાદ રાત્રે ૩.૨૦ વાગ્‍યે યુવતીએ ઘરે જવા માટે કેબ મંગાવી હતી. અને જયારે તે ૩.૪૦ વાગ્‍યે ઘરે પહોંચી ત્‍યારે તે ઊંઘમાં હતી. ઘરે પહોંચ્‍યા બાદ જયારે ડ્રાઈવરે કારનો પાછળ દરવાજો ખોલીને જોયું તો યુવતી સૂઈ ગઈ હતી. જે બાદ તે કારને યુવતીના ઘરની નજીક સુમસામ જગ્‍યાએ લઈ ગયો હતો. આ ઉપરાંત પોલીસ સુત્રોએ એમ પણ જણાવ્‍યું કે, કારને સુમસામ જગ્‍યાએ પાર્ક કરી તેણે પહેલાં યુવતી સાથે પોતાના કેમેરામાં સેલ્‍ફી લીધી હતી. અને તે બાદ યુવતી પર દુષ્‍કર્મ આચર્યું હતું.
જયારે પીડિતા ભાનમાં આવી ત્‍યારે તે ચોંકી ઉઠી હતી. તેણે કેબ ડ્રાઈવરને ધક્કો મારી પોતાની બેગ અને ડ્રાઈવરનો મોબાઈલ ફોન છીનવી લીધો હતો અને ભાગીને પોતાના ઘરે પહોંચી ગઈ હતી. તે સવારે ૪.૪૫ વાગ્‍યે પોતાના ઘરે પહોંચી હતી. ઘરે પહોંચતાની સાથે જ તેણે પોલીસને જાણ કરી દીધી હતી. પોલીસે આરોપીનો મોબાઈલ ફોન તપાસ્‍યો તો ચોંકી ઉઠી હતી. તેમાંથી દુષ્‍કર્મ પહેલાં યુવતી સાથે લીધેલી સેલ્‍ફી હતી.
યુવતીની ફરિયાદને આધારે પોલીસે સીસીટીવી ફૂટેજની મદદથી તપાસ શરૂ કરી હતી. અને યુવતીને મેડિકલ તપાસ માટે મોકલી દેવામાં આવી હતી. આ મામલે પોલીસે કેઆર પુરમની પાસે અવલાહલ્લીના રહેવાસી કેબ ડ્રાઈવર દેવરાજ ઉર્ફે દેવરાજુલુની ધરપકડ કરી છે. આરોપી મૂળ આંધ્ર પ્રદેશનો છે. અને રોજીરોટી માટે બે વર્ષ પહેલાં બેંગલુરુ આવ્‍યો હતો. જો કે, આરોપીએ પહેલાં કહ્યું હતું કે, તે નિર્દોષ છે. પણ પોલીસની આકરી પુછતાછ બાદ તેણે પોતાનો ગુનો કબૂલ કરી દીધો હતો. જો કે, આ દુષ્‍કર્મની આ ઘટનાએ બેંગલુરુમાં મહિલાઓની સુરક્ષાને લઈને અનેક સવાલો ઉભા કરી દીધા છે. (૨૨.૬)