Gujarati News

નવી દિલ્હી, તા.૨૬: પોલીસ કમિશનર રાકેશ અસ્થાનાની નિમણૂકને પડકારતી અરજી પર સુનાવણી કરતી વખતે સુપ્રીમ કોર્ટે શુક્રવારે નોટિસ જારી કરી છે. રાકેશ અસ્થાનાને બે સપ્તાહમાં જવાબ આપવા માટે કહેવામાં આવ્યું છે. રાકેશ અસ્થાનાની નિમણૂકને એડવોકેટ પ્રશાંત ભૂષણે પડકારી હતી. ચેલેન્જ પિટિશનમાં કહેવામાં આવ્યું છે કે રાકેશ અસ્થાનાની નિમણૂક નિયમોની અવગણના કરીને કરવામાં આવી હતી.

ઉલ્લેખનીય છે કે, દિલ્હી હાઈકોર્ટે પ્રશાંત ભૂષણની આ અરજીને ફગાવી દીધી હતી. અગાઉ દિલ્હી પોલીસ કમિશનર રાકેશ અસ્થાનાની નિમણૂકને પડકારતી અરજીનો જવાબ આપતા, કેન્દ્ર સરકારે રાકેશ અસ્થાનાની નિમણૂકને સમર્થન આપ્યું હતું. દિલ્હી હાઈકોર્ટમાં આપેલા જવાબમાં ગૃહ મંત્રાલયે કહ્યું હતું કે દિલ્હીના રાષ્ટ્રીય રાજધાની પ્રદેશમાં કાયદો અને વ્યવસ્થા સંબંધિત વિવિધ પડકારોને ધ્યાનમાં રાખીને ગુજરાત કેડરના આઈપીએસ અધિકારી રાકેશ અસ્થાનાને દિલ્હી પોલીસ કમિશનર તરીકે નિયુકત કરવામાં આવ્યા હતા.

કેન્દ્રએ જણાવ્યું હતું કે દિલ્હીના પોલીસ વડા તરીકે એવા અધિકારીની નિમણૂક કરવાની જરૂરિયાત અનુભવાઈ હતી જે મોટા રાજયમાં મોટા પોલીસ દળનું નેતૃત્વ કરી શકે અને રાજકીય અને જાહેર વ્યવસ્થા સંબંધિત સમસ્યાઓનો સામનો કરી શકે.

સોગંદનામામાં  કેન્દ્ર સરકારે સ્પષ્ટપણે કહ્યું છે કે રાકેશ અસ્થાનાની દિલ્હી પોલીસ કમિશનર તરીકે નિમણૂકમાં કોઈ નિયમની અવગણના કરવામાં આવી નથી અને આ નિમણૂક તમામ લાગુ નિયમો અને નિયમોનું પ્રમાણિકપણે પાલન કર્યા પછી જ કરવામાં આવી છે. દિલ્હી પોલીસ કમિશનર તરીકે રાકેશ અસ્થાનાની નિમણૂકને પડકારતી અને તે જ આધાર પર રાકેશ અસ્થાનાની નિમણૂકને રદ કરવાની માંગ કરતી PILના જવાબમાં દિલ્હી હાઈકોર્ટમાં એફિડેવિટ દાખલ કરવામાં આવી હતી.