Gujarati News

Gujarati News

News of Tuesday, 27th February 2024

રાજકોટમાં નામાંકિત ઓરબીટ ગ્રુપ ઉપર આયકર દરોડા

રાજકોટમાં ગગનચૂંબી ઇમારત બાંધનાર આવકવેરાની ઝપટે : વહેલી સવારથી કાર્યવાહી : ઓરબીટ ગાર્ડન, ઓરબીટ સ્‍કાય ગાર્ડન, ઓરબીટ ગેલેકસી ગાર્ડન તેમજ ડેવલોપર્સ દિલીપભાઇ લાડાણી : એસોસીએટ્‍સની સહયોગી પેઢી સહિત ૩૦ સ્‍થળોએ ૧૫૦થી વધુ અધિકારીઓ દ્વારા તપાસનો ધમધમાટ

રાજકોટના નામાંકિત બિલ્‍ડર ઓરબીટ ગ્રુપ ઉપર આજ વહેલી સવારથી ૩૦થી વધુ સ્‍થળો ઉપર આવકવેરા વિભાગે દરોડા પાડયા છે. આવકવેરા વિભાગના ૧૫૦થી વધુ અધિકારીઓ દરોડાની કાર્યવાહીમાં જોડાયા છે. પ્રસ્‍તુત તસ્‍વીરમાં ઓરબીટ ગ્રુપના પ્રોજેકટ અને ઓફિસો નજરે પડે છે. (તસ્‍વીર : અશોક બગથરીયા)

રાજકોટ તા. ૨૭ : ૨૦૨૩-૨૪ના નાણાકીય વર્ષની પૂર્ણતાના આરે છે હવે માત્ર એક જ મહિનો બાકી છે ત્‍યારે ઇન્‍કમટેક્ષે તેના નિર્ધારત લક્ષ્યાંકને પૂર્ણ કરવા સર્વે અને સર્ચની કામગીરી તેજ કરી છે. અગાઉ અમદાવાદ, વડોદરા, સુરત, મહેસાણામાં બિલ્‍ડર ગ્રુપ અને ઉદ્યોગકારો ઉપર સર્વે અને સર્ચ હાથ ધરવામાં આવ્‍યા હતા ત્‍યારે હવે આજે વહેલી સવારથી રાજકોટના નામાંકિત બિલ્‍ડર્સ ગ્રુપ ઓરબીટ ઉપર આવકવેરા વિભાગે મેગા સર્ચ ઓપરેશન હાથ ધર્યુ છે.

રાજકોટમાં છેલ્લા ત્રણ દાયકાથી રીયલ એસ્‍ટેટ ક્ષેત્રે અનેક મોટા અને ગગનચુંબી ઇમારતોનું નિર્માણ કરનાર શ્રી દિલીપભાઇ લાડાણી એસોસીએટ અને ઓરબીટ ગ્રુપ તેમજ તેની સહયોગી પેઢી તેમજ વિનેશભાઇ પટેલ, વિપુલભાઇ પટેલ, સમીરભાઇ પટેલ, મગનભાઇ સહિત ૨૦થી વધુ ડાયરેકટરો ઉપર આજ સવારે ૩૦થી વધુ સ્‍થળો ઉપર ઇન્‍વેસ્‍ટીગેશન વીંગ દ્વારા ૧૫૦થી વધુ અધિકારીઓએ સર્ચ ઓપરેશન હાથ ધરતા રીયલ એસ્‍ટેટ ક્ષેત્રે ખળભળાટ મચી જવા પામેલ છે.

આવકવેરા વિભાગ રાજકોટ ઇન્‍વેસ્‍ટીગેશન વીંગના ડાયરેકટર શ્રી મીના અને આસી. ડાયરેકટર શ્રી આદેશ તિવારીના માર્ગદર્શન હેઠળ રાજકોટ ઇન્‍વેસ્‍ટીગેશન વીંગ ઓફ ઇન્‍કમટેક્ષ ઉપરાંત અમદાવાદ, વડોદરા, સુરત, મહેસાણા સહિતના અધિકારીઓ રાજકોટ ખાતે પાડવામાં આવેલા દરોડાની કાર્યવાહીમાં જોડાયા છે.

ઓરબીટ ગ્રુપ દ્વારા ગાર્ડન નામથી અનેક પ્રોજેકટો કાર્યરત છે. જેમાં ગેલેકસી ગાર્ડન, ઓરબીટ સ્‍કાય ગાર્ડન, ઓરબીટ ગાર્ડન સહિતના પ્રોજેકટો કાર્યરત છે. રાજકોટમાં પ્રથમ ૪૦ માળના બિલ્‍ડીંગનું નિર્માણ કાર્ય માટેનો પ્રોજેકટ પણ લોન્‍ચ થઇ રહ્યો છે.

રિયલ એસ્‍ટેટ ક્ષેત્રે વિશ્વાસનું પ્રતિક ગણાતુ ઓરબીટ ગ્રુપ ઉપર પડેલા દરોડા બે દિવસ સુધી ચાલનાર હોવાનું તેમજ મોટી કરપાત્ર રકમ મળવાનો નિર્દેશ આયકર વર્તુળોએ જણાવ્‍યો છે.

(3:07 pm IST)