Gujarati News

Gujarati News

News of Monday, 27th September 2021

અંતે જીવનનો મોટો નિર્ણય મારે જ લેવાનો છે : શિલ્પા શેટ્ટી

પોર્નોગ્રાફી કેસમાં રાજ કુંદ્રા જેલમાંથી મુક્ત થયો હતો : રાજ કુંદ્રાના ઘરે આવ્યા પછી તેના અથવા શિલ્પા શેટ્ટીમાંથી કોઈની પણ પ્રતિક્રિયા હજી સુધીમાં સામે આવી નથી

મુંબઈ, તા.૨૭ : પોર્નોગ્રાફિક ફિલ્મો બનાવવાના આરોપમાં બે મહિના જેલમાં બંધ રહેલા શિલ્પા શેટ્ટીનો પતિ રાજ કુંદ્રા ગત સોમવારે જામીન પર છૂટો થયો હતો. રાજ કુંદ્રાની ૧૯મી જુલાઈએ મુંબઈ ક્રાઈમ બ્રાંચે ધરપકડ કરી હતી અને ૨૦મી સપ્ટેમ્બરે તેના જામીન મંજૂર થયા હતા. ૨૧મી સપ્ટેમ્બરે તે ઘરે પરત આવ્યો હતો. રાજ કુંદ્રાના ઘરે આવ્યા તેની અથવા શિલ્પા શેટ્ટીમાંથી કોઈની પણ પ્રતિક્રિયા હજી સુધી સામે આવી નથી. જો કે, શિલ્પા શેટ્ટી સોશિયલ મીડિયા પર એક્ટિવ રહે છે.

શિલ્પા શેટ્ટી ઘણા દિવસથી પુસ્તકના પેજ શેર કરી રહી છે અને તેના દ્વારા આડકતરી રીતે ઘણી વાતો કરતી રહે છે. હાલમાં તેણે ફરીથી ઈન્સ્ટાગ્રામ સ્ટોરી પર એક પોસ્ટ શેર કરી છે. જેમાં લખ્યું છે અંતે તો આપણે શું પસંદ કરીએ છીએ અને શું પસંદ નથી કરતા તેના માટે આપણે પોતે જવાબદાર છીએ.

જો આપણે નસીબદાર હોઈશું તો, આપણને મિત્રો અને પરિવારનો સારો સપોર્ટ મળશે, પરંતુ એક સમયે આપણે નિર્ણયો લેવા પડે છે અને તેના માટે જવાબદારી પણ લેવી પડે છે. સાચુ કે ખોટુ, તે આપણા પર છે. આપણે ઊંડો શ્વાસ લઈએ છીએ, આપણને જે સલાહ મળી છે તેના પર ધ્યાન આપીએ છીએ, પોતાના અનુભવ પર વિચાર કરીએ છીએ અને પછી તે કરીએ છીએ જે શ્રેષ્ઠ હોય છે. જો બાબત ઠીક જાય તો આપણે રાહતનો શ્વાસ લઈએ છીએ અને જો ઠીક થાય તો તેની જવાબદારી લઈએ છીએ અને આગળ વધી જઈએ છીએ.

પોસ્ટમાં આગળ લખ્યું છે મને ઘણી સલાહ અને સપોર્ટ મળ્યો, પરંતુ મને તે અહેસાસ થયો કે આખરે પોતાના જીવનના સૌથી મોટા નિર્ણય મારે લેવાના છે.

રાજ કુંદ્રાની ધરપકડ બાદ શિલ્પા શેટ્ટી પણ ટ્રોલ થઈ હતી. જેના કારણે તેણે ઘણા દિવસો સુધી ઘર બહાર નીકળવાનું ટાળ્યું હતું. થોડા દિવસના બ્રેક બાદ તેણે ફરીથી સુપર ડાન્સર ચેપ્ટર માટે શૂટિંગ શરૂ કર્યું હતું.રાજ કુંદ્રાની વાત કરીએ તો, સોમવારે જામીન મળ્યા બાદ મંગળવારે તે ઘરે આવ્યો હતો. શિલ્પા શેટ્ટીએ પોતાનો બોડીગાર્ડ રાજ કુંદ્રાને લેવા માટે મોકલ્યો હતો.

(7:52 pm IST)