Gujarati News

પટના, તા.૨૭ : બિહારના મોતિહારીમાં એક હૃદય કંપાવનારી ઘટના સામે આવી છે, જ્યાં પ્રેમ લગ્નથી નારાજ યુવતીના પરિવારજનોએ યુવકની હત્યા કરી નાખી. પ્રેમીનો પરિવાર પોલીસ અને કોર્ટમાં રક્ષણ માટે આજીજી કરતા રહ્યા પરંતુ પ્રેમિકાના સગાઓએ ઘરમાં ઘુસીને તેને ગોળી મારીને મોતને ઘાટ ઉતારી દીધો. પતિના મૃત્યુને કારણે પત્ની પૂજા ભાંગી પડી છે, તેણે ૧૨ લોકો વિરુદ્ધ પોલીસમાં ફરિયાદ નોંધાવતા વધુ કાર્યવાહી હાથ ધરવામાં આવી છે.

પ્રેમી-પ્રેમિકા તાજેતરમાં ૨૦૧૯માં લગ્ન બાદ ઘરે પરત ફર્યા હતા. પોલીસ ફરિયાદમાં પૂજાએ તેના પિતા અને ભાઈઓ પર તેના પતિની હત્યાનો આરોપ લગાવ્યો છે. મામલાની ગંભીરતાને જોતા એસપી પીડિતાના પરિવારને મળ્યા હતા અને ઘટના અંગે પૂછપરછ કરી હતી. એવો પણ આરોપ છે કે હુમલાખોરો પૂજા અને અવનીશની આઠ મહિનાની બાળકીને પોતાની સાથે લઈ ગયા હતા, જોકે તેમને ગામની નજીક છોડી ગયા હતા. જેને ગ્રામજનોની મદદથી સલામત રીતે પૂજા સુધી પહોંચાડવામાં આવી હતી.

પ્રાપ્ત માહિતી અનુસાર, એક ડઝનથી વધુ હુમલાખોરોએ અવનીશના માથા અને શરીરમાં ચાર ગોળી મારી હતી, જેના કારણે તેનું ઘટનાસ્થળે જ મોત થયું હતું. આ સાથે હુમલાખોરોએ પૂજાની સાથે અવનીશના પિતા પ્રેમચંદ્ર સિંહ અને માતાને પણ માર માર્યો હતો. મૃતક અવનીશની માતાની હાલત નાજુક છે, જેને મોતિહારી સદર હોસ્પિટલના આઈસીયુમાં દાખલ કરવામાં આવ્યા છે. પિતા પ્રેમચંદ્ર સિંહના પગના હાડકા તૂટી ગયા છે અને માથામાં ગંભીર ઈજા થઈ છે. પ્રેમચંદ્ર સિંહ ઘોડાસાહન બ્લોકની અથમોહન ગ્રામીણ પોસ્ટ ઓફિસમાં પોસ્ટમાસ્ટર તરીકે કામ કરે છે. જીતના પોલીસ સ્ટેશનના સથૌરા ગામમાં સોમવારે મોડી સાંજે બનેલી આ ઘટના બાદ પૂજા  મોતિહારી સદર હોસ્પિટલમાં છે. તેણે કહ્યું કે તે પોલીસ અધિકારીઓને વારંવાર આજીજી કરી રહી હતી. દરમિયાન જીતના પોલીસ સ્ટેશનની પોલીસ પણ આવી ગઈ હતી, જોકે પોલીસ ગયાના અડધા કલાક બાદ હુમલો થયો હતો. હુમલાખોરો ઘરની દિવાલ તોડીને ઘરમાં ઘૂસ્યા હતા અને અવનીશ પર અંધાધૂંધ ફાયરિંગ કર્યું હતું.

પીડિતાના પરિજનોને મળ્યા બાદ એસપી નવીનચંદ્ર ઝાએ કહ્યું કે ૧૨ લોકો વિરુદ્ધ કેસ નોંધવામાં આવ્યો છે. સુરક્ષાની વારંવાર માંગ કરવાના પ્રશ્ન પર, એસપીએ કહ્યું કે સિકરહાના ઢાકાના સબ ડિવિઝનલ પોલીસ અધિકારીને સમગ્ર મામલાની તપાસ કરવાનો નિર્દેશ આપવામાં આવ્યો છે. ટૂંક સમયમાં આરોપીઓ સામે પણ કાર્યવાહી કરવામાં આવશે.