Gujarati News

નવી દિલ્હીઃ  કેરળના રાજ્યપાલ આરિફ મોહમ્મદ ખાને મલયાલી હિંદુઓ દ્વારા આયોજિત હિંદુ સંમેલનના ઉદ્ઘાટન સમારોહમાં લોકોને સંબોધિત કરતી વખતે બીબીસીની ડોક્યુમેન્ટરી પર નિશાન સાધ્યું હતું.

આરિફ ખાને કહ્યું કે ભારત માટે અંધકારની આગાહી કરનારાઓ ચિંતિત છે, તેથી તેઓ નકારાત્મક પ્રચાર કરી રહ્યા છે. તેમણે ઉમેર્યું હતું કે જે લોકોએ ભારત માટે અંધકારની આગાહી કરી હતી, જેમણે કહ્યું હતું કે ભારત સેંકડો ટુકડા થઈ જશે, તેઓ નારાજ છે. એટલા માટે તમે આ બધા ષડયંત્રો જુઓ છો જ્યાં તેઓ આ પ્રકારના નકારાત્મક પ્રચારમાં આવી ડોક્યુમેન્ટ્રીને સામેલ કરવાનો પ્રયાસ કરી રહ્યા છે. અંગ્રેજો ભારતમાં આવ્યા ત્યારે તેઓએ ડોક્યુમેન્ટ્રી કેમ ન બનાવી?
 

આ સાથે કેરળના રાજ્યપાલ આરિફ મોહમ્મદ ખાને કાર્યક્રમમાં હાજર લોકોને તેમને 'હિંદુ' કહેવાનું કહ્યું. તેમણે ટિપ્પણી કરી કે 'હિન્દુ' એ કોઈ ધાર્મિક શબ્દ નથી, પરંતુ તે ચોક્કસ ભૌગોલિક વિસ્તારમાં જન્મેલા લોકોની વ્યાખ્યા કરે છે. ખાને કહ્યું, "તમે મને હિન્દુ કેમ નથી કહેતા? હું હિંદુને ધાર્મિક શબ્દ માનતો નથી. 'હિન્દુ' એ ભૌગોલિક શબ્દ છે. કોઈપણ જે ભારતમાં જન્મે છે, કોઈપણ જે અહીં રહે છે, અથવા ભારતમાં બનેલો ખોરાક ખાય છે, કોઈપણ જે ભારતની નદીઓનું પાણી પીવે છે, તે પોતાને હિન્દુ કહેવાનો હકદાર છે.