Gujarati News

Gujarati News

News of Wednesday, 28th July 2021

ભગવાનને ચઢાવેલા ૫૦ રૂપિયા પૂજારીએ પોતાના ખિસ્સામાં મૂકયા : ટ્રસ્ટીએ નોંધાવી ફરિયાદ

એક પૂજારીને મંદિરમાંથી ૫૦ રૂપિયાની ચોરી કરવાનું મોંઘું પડ્યું

ઈન્દોર,તા. ૨૮: મધ્યપ્રદેશના ઈન્દોરમાં એક એવી ઘટના સામે આવી છે કે જેમાં એક પૂજારીને મંદિરમાંથી ૫૦ રૂપિયાની ચોરી કરવાનું મોંઘું પડ્યું છે. મંદિરમાં લગાવાયેલા સીસીટીવી કેમેરામાં આરોપીનું કૃત્ય કેદ થઈ ગયું છે. ટ્રસ્ટીએ આ બાબતે નામજોગ પોલીસ ફરિયાદ નોંધાવી છે.

આ ઘટના મધ્યપ્રદેશના ઈન્દોરમાં બની છે. મળતી માહિતી મુજબ, ત્યાંના ચૈતન્ય રામ મંદિર ટ્રસ્ટે મંદિરમાં ૫૦ રૂપિયાની ચોરીની ઘટના બાબતે પોલીસ ફરિયાદ નોંધાવી છે. આ મંદિરના ટ્રસ્ટીનું કહેવું છે કે મંદિરમાં અગાઉ પણ ઘણીવખત આરોપી આ પ્રકારની ઘટનાઓને અંજામ આપી ચૂકયો છે. ટ્રસ્ટીનો આરોપ છે કે આરોપી રાજારામ હરિદાસના પિતાજી મંદિરમાં મુખ્ય પૂજારી તરીકે સેવા આપતા હતા.

તેમણે વધુમાં જણાવ્યું કે મંદિરના મુખ્ય પૂજારીનું નિધન થયા પછી આરોપી રાજારામે મંદિરમાં બે રૂમ પર કબ્જો કરી લીધો છે. એવું પણ જાણવા મળી રહ્યું છે કે આ પ્રકારની ચોરીની ઘટના અગાઉ પણ બની ચૂકી છે. ગત દિવસો દરમિયાન મંદિરમાં સીસીટીવી કેમેરા નહીં હોવાના કારણે અત્યાર સુધી ચોરીનું કારણ જાણવા મળ્યું નહોતું પણ હવે મંદિરમાં સીસીટીવી કેમેરા લગાવ્યા બાદ ચોરીની ઘટના વિશે જાણવા મળ્યું છે. આ મામલે ટ્રસ્ટે આરોપી રાજારામ વિરુદ્ઘ ચોરીની ફરિયાદ નોંધાવી છે.

(10:28 am IST)