Gujarati News

નવી દિલ્હી, તા.૨૮: કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરી આજે એટલે કે મંગળવારે વિવિધ રાષ્ટ્રીય ધોરીમાર્ગ પ્રોજેકટ્સનો શિલાન્યાસ કરશે. તે ઝોજીલા ટનલનું  પણ નિરીક્ષણ કરશે, જે બાંધકામ હેઠળ એશિયાની સૌથી લાંબી ટનલ છે. આ ટનલ પૂર્ણ થયા બાદ શ્રીનગર-લેહ-લદ્દાખ હાઇવે શિયાળામાં ભારે બરફવર્ષા વચ્ચે પણ બંધ રહેશે નહીં અને લદ્દાખ જવું ખૂબ જ સરળ રહેશે.

એટલે કે, લદ્દાખ હવે બાકીના ભારતથી અલગ રહેશે નહીં. એવું કહેવામાં આવી રહ્યું છે કે ૧૮ કિમી લાંબો એપ્રોચ રોડ પણ બનાવવામાં આવશે, જે ઝેડ મોર ટનલથી ઝોજીલા ટનલ સુધી જશે. આ રસ્તા પર આવા હિમપ્રપાત સંરક્ષણ માળખા બનાવવામાં આવી રહ્યા છે, જે બે ટનલ વચ્ચે ઓલ-વેધર કનેકિટવિટી પૂરી પાડશે.

અહેવાલ મુજબ આ ટનલ લગભગ ૧૪.૧૫ કિમી લાંબી છે. તેને એશિયાની સૌથી લાંબી ટનલ તરીકે વર્ણવવામાં આવી છે. આ ટનલ પૂર્ણ થયા પછી, જે અંતર કાપવામાં સાડા ત્રણ કલાક લાગે છે, તે માત્ર ૧૫ મિનિટમાં પૂર્ણ થશે.

આ ટનલ સામાન્ય જનતા અને પ્રવાસીઓ માટે તેમજ ભારતીય સેના માટે ખૂબ મહત્વની છે. તેની પૂર્ણતા પર, લદ્દાખ તમામ ઋતુઓમાં કાશ્મીર ખીણ સાથે સંપર્કમાં રહેશે. શ્રીનગર, દ્રાસ, કારગિલ અને લેહના વિસ્તારો જોડાયેલા રહેશે. આ પણ ખૂબ મહત્વનું છે કારણ કે સેના માટે આ રસ્તો સિયાચીન તરફ જાય છે. શ્રીનગર-કારગિલ-લેહના માર્ગ પર આવનારા સમયમાં હિમપ્રપાતનો ભય રહેશે નહીં.

સુરક્ષાના પગલાંઓ

દર ૭૫૦ મીટરના અંતરે ટનલની અંદર રસ્તાની બંને બાજુએ ઇમરજન્સી ટેક-બાય હશે. કેરેજ વેની બંને બાજુ ફૂટપાથ પણ હશે.

યુરોપીયન ધોરણો મુજબ, સુરંગની અંદર દર ૧૨૫ મીટર પર ઇમરજન્સી કોલની સુવિધા હશે.

સમગ્ર ટનલમાં ઓટોમેટિક ફાયર ડિટેકશન સિસ્ટમ લગાવવામાં આવશે અને મેન્યુઅલ ફાયર એલાર્મ માટે બટન પણ હશે.

સુરંગની દિવાલો પર CCTV કેમેરા લગાવવાના છે. ટનલના બંને છેડે થાંભલા મૂકીને કેમેરા લગાવવામાં આવશે. સીસીટીવી ફૂટેજ કંટ્રોલ રૂમને મોકલવામાં આવશે.

ઝેડ મોર્ડ અને જોજિલા ટનલની સમીક્ષા અને નિરીક્ષણ કરશે. એસ્કેપ ટનલની લંબાઈ ૬.૫ કિમી અને ઝેડ-મોર ટનલની લંબાઈ ૬.૫ કિમી છે. ઝેડ-મોર ટનલ સોનમાર્ગ ટુરિઝમ સિટીને ઓલ-વેધર કનેકિટવિટી પૂરી પાડશે. જોજિલા ટનલ પ્રોજેકટને પૂર્ણ કરવાનો ખર્ચ MEIL દ્વારા બિડમાં ૪૫૦૯.૫૦ કરોડ રૂપિયા રાખવામાં આવ્યો હતો. અન્ય કંપનીઓએ તેના કરતા ઘણી વધારે કિંમત ચૂકવી હતી.

આ કારણોસર MEILને આ પ્રોજેકટ પૂર્ણ કરવાનો કોન્ટ્રાકટ આપવામાં આવ્યો છે. શ્રીનગર-કારગિલ-લેહ રાષ્ટ્રીય ધોરીમાર્ગ પર નવેમ્બરથી એપ્રિલ સુધી જોજિલા પાસ પર ૧૧,૫૭૮ ફૂટની ઉંચાઇએ ભારે બરફવર્ષાને કારણે ભારે મુશ્કેલી પડે છે તેવામાં આ ટનલ ખુબ મહત્વપૂર્ણ રહેશે. જોજિલા પાસ પર બનાવવામાં આવી રહેલી ટનલ શ્રીનગરને કારગિલ અને લેહ સાથે જોડી દેશે. શ્રીનગરથી લેહ પહોંચવામાં ત્રણ કલાકથી વધુ સમય લાગે છે અને વધારે હિમવર્ષાને કારણે શિયાળામાં છ મહિના સુધી રસ્તો બંધ રહે છે, આમ લેહ-લદ્દાખને બાકીના દેશોથી કાપી નાખે છે જે સમસ્યા આવનારા સમયમાં દૂર થશે.