Gujarati News

મુંબઈ , તા.૩૦ : આ ઈન્ટરનેટનો જમાનો છે ત્યારે છેતરપિંડી કરતા લોકોથી સાવધાન રહેવાની ઘણી જરુરી છે. સાઈબર પોલીસ દ્વારા પણ વારંવાર લોકોને વારંવાર સાવધાની રાખવા માટે સૂચના આપવામાં આવે છે. મુંબઈમાં બનેલી એક ઘટનામાં એક શખ્સે વેપારીનો ફોન હેક કર્યા બાદ તેમાંથી એવી વસ્તુ મળી આવી કે તેણે મોટો કાંડ કર્યો હોવાનું પોલીસ ચોપડે નોંધાયું છે. ફોન હેક કરનારા શખ્સે તેમાં રહેલા ફોટોના આધારે ૩૦ લાખ રૃપિયાની ખંડણી માગી છે. પોતાના પતિ સાથે બનેલી ઘટના અંગે પત્નીએ પોલીસ ફરિયાદ નોંધાવી છે. જ્યારે મહિલા પતિનું કબાટ સાફ કરી રહ્યા હતા ત્યારે તેમને મળેલી એક ચબરખીના કારણે ઘટના તેમની સામે આવી હતી, આ પછી તેમણે પોતાના પતિ સાથે વાત કરીને ફરિયાદ નોંધાવી છે.

૪૦ વર્ષની મુંબઈની પરિણીતાએ નોંધાવેલી પોલીસ ફરિયાદમાં જણાવ્યું છે કે, કોઈ શખ્સે તેમના વેપારી પતિનો ફોન હેક કરી લીધા પછી તેમાં સેવ કરેલી તેમની બન્નેની અંગતપળોની તસવીરને ચોરી લીધી હતી અને બ્લેકમેઈલ કરીને ૩૦ લાખ રૃપિયા આપવાની માગણી કરી છે. આરોપીએ વેપારીના ફોનમાંથી ચોરેલા ફોટોગ્રાફ્સ વાયરલ કરી દેવાની ધમકી આપી હતી.

રફિક અહેમદ કિડવાણી માર્ગ પોલીસે નોંધેલી ફરિયાદ મુજબ રૃપિયાની માગણી કરતા શખ્સ સામે ૈંઁઝ્રની કલમ મુજબ ધમકી આપવી, ખંડણી માગવી અને ઈન્ફોર્મેશન ટેક્નોલોજી એક્ટ હેઠળ ફરિયાદ નોંધવામાં આવી છે. પોલીસ દંપતીની અંગતપળોની તસવીરો ચોરીને ખંડણી માગનારા આરોપીની શોધખોળ કરી રહી છે.

પોલીસે આ કેસ અંગે જણાવ્યું કે, મહિલાએ આરોપ લગાવ્યો છે કે હાલમાં જ તેઓ પોતાના પતિના કબાટની સફાઈ કરી રહ્યા હતા ત્યારે એક ચબરખી મળી હતી જેમાં કેટલીક ચૂકવણીનો ઉલ્લેખ હતો. જ્યારે પરિણીતાએ આ અંગે પોતાના પતિ સાથે વાત કરી તો તેમણે જણાવ્યું કે એ વ્યક્તિને રૃપિયા આપ્યા હતા જેણે અંગતપળોના ફોટો સોશિયલ મીડિયા પર વાયરલ કરવાની ધમકી આપીને ૩૦ લાખ રૃપિયાની માગણી કરી હતી.

ફરિયાદના આધારે પોલીસ આરોપીને ટેક્નોલોજીનો ઉપયોગ કરીને પકડી પાડવાના પ્રયાસ કરી રહી છે. માનવામાં આવે છે કે આરોપી પકડાયા પછી તેણે આચરેલા અન્ય ગુનાઓનો પણ ભાંડો ફૂટી શકે છે.