Gujarati News

Gujarati News

News of Tuesday, 30th November 2021

ધોની, રોહિત શર્મા અને વિરાટ કોહલી થયા રિટેન, હાર્દિક પંડ્યા અને રાશિદ ખાન મેગા ઓક્શનમાં પ્રવેશ કરશે

મુંબઈ ઈન્ડિયન્સે કિરોન પોલાર્ડ અને સૂર્યકુમાર યાદવને જાળવી રાખ્યા: જસપ્રિત બુમરાહ અને રોહિત શર્માને પણ જાળવ્યા

મુંબઈ ; મહેન્દ્ર સિંહ ધોની, વિરાટ કોહલી, રોહિત શર્મા, જસપ્રિત બુમરાહ, કિરોન પોલાર્ડ, કેન વિલિયમસન અને ગ્લેન મેક્સવેલ એ મોટા નામોમાં સામેલ છે જેને વર્તમાન ફ્રેન્ચાઈઝીએ ઈન્ડિયન પ્રીમિયર લીગ (આઈપીએલ) 2022 માટે જાળવી રાખવાનો નિર્ણય કર્યો છે, જ્યારે હાર્દિક પંડ્યા અને ઈશાન કિશન આ વખતે મેગા ઓક્શનમાં સામેલ થશે. અફઘાનિસ્તાનના લેગ સ્પિનર રાશિદ ખાને સનરાઈઝર્સ હૈદરાબાદની એક ઓફરને ઠુકરાવી દીધી છે જેમાં તેને રિટેન કરવામાં આવ્યો હતો. હૈદરાબાદે હવે કેન વિલિયમસન તેમજ યુવા J&K ખેલાડીઓ ઉમરાન મલિક અને અબ્દુલ સમદને જાળવી રાખ્યા છે. મતલબ કે વિલિયમસન હવે સનરાઇઝર્સનો કાયમી કેપ્ટન બની શકે છે.

મુંબઈ ઈન્ડિયન્સે કિરોન પોલાર્ડ અને સૂર્યકુમાર યાદવને જાળવી રાખ્યા હતા, તે પહેલાં જસપ્રિત બુમરાહ અને રોહિત શર્માને પણ MI દ્વારા જાળવી રાખવામાં આવ્યા હતા. મતલબ કે આ વખતે હરાજીમાં હાર્દિક પંડ્યા અને ઈશાન કિશન સામેલ થશે. રોયલ ચેલેન્જર્સ બેંગ્લોરે પણ ત્રણ ખેલાડીઓને રિટેન કરવાનો નિર્ણય લીધો છે. ટીમે પહેલાથી જ વિરાટ કોહલી અને ગ્લેન મેક્સવેલને પોતાની સાથે જાળવી રાખ્યા હતા અને હવે ઝડપી બોલર મોહમ્મદ સિરાજ પણ આરસીબી સાથે રહેશે. જો આમ થશે તો યુઝવેન્દ્ર ચહલ અને દેવદત્ત પડિકલ IPL ઓક્શનમાં સામેલ થઈ જશે. રાજસ્થાન રોયલ્સે સંજુ સેમસનને પોતાની સાથે રાખવાની જાહેરાત કરી હતી અને હવે જોસ બટલર અને યશસ્વી જયસ્વાલ પણ રાજસ્થાન સાથે રહેશે.

(11:34 pm IST)