બલૂચિસ્તાનના લાસબેલામાં પૂર રાહત કામગીરીમાં ગયેલું પાકિસ્તાન આર્મીનું હેલિકોપ્ટર ગુમ

હેલિકોપ્ટરમાં 12 કોર્પ્સ કમાન્ડર જનરલ સરફરાઝ અલી અને અન્ય પાંચ વરિષ્ઠ સૈન્ય અધિકારીઓ હતા : ISPRની મીડિયા વિંગનું ટ્વિટ

નવી દિલ્લી તા.02 : બલૂચિસ્તાનના લાસબેલામાં પૂર રાહત કામગીરીમાં ગયેલું પાકિસ્તાન આર્મીનું હેલિકોપ્ટર ગુમ થયું છે. હેલિકોપ્ટરમાં 12 કોર્પ્સ કમાન્ડર જનરલ સરફરાઝ અલી અને અન્ય પાંચ વરિષ્ઠ સૈન્ય અધિકારીઓ હતા. જેઓ બલૂચિસ્તાનમાં પૂર રાહત કામગીરી પર નજર રાખી રહ્યા હતા. જે અંગેની માહિતી પાકિસ્તાન આર્મ્ડ ફોર્સિસ (ISPR) ની મીડિયા વિંગે ટ્વિટર પર આપી હતી.

સર્ચ ઓપરેશન ચાલુ છે. જ્યારે પાકિસ્તાની મીડિયા રિપોર્ટ્સમાં કહેવામાં આવ્યું છે કે હેલિકોપ્ટરનો એર ટ્રાફિક કંટ્રોલ (ATC) સાથે સંપર્ક તૂટી ગયો હતો અને તે છેલ્લા પાંચ કલાકથી ગુમ છે.

નોંધનીય છે કે, દેશના કેટલાક ભાગોમાં ચાલી રહેલા પૂરની વચ્ચે, પાકિસ્તાની સેનાએ બલૂચિસ્તાન, સિંધ, ગિલગિટ-બાલ્ટિસ્તાન અને ખૈબર પખ્તુનખ્વાના પૂર પ્રભાવિત જિલ્લાઓમાં બચાવ અને રાહત પ્રયાસો શરૂ કર્યા, જેનાથી હજારો દેશભરમાં ફસાયેલા છે. ઇન્ટર-સર્વિસ પબ્લિક રિલેશન્સ (ISPR) એ જણાવ્યું હતું કે બલૂચિસ્તાનમાં “1 જુલાઈથી અભૂતપૂર્વ 467 ટકા વધારાનો વરસાદ થયો છે”. બલૂચિસ્તાનમાં ભારે વરસાદથી 29 જિલ્લાઓ પ્રભાવિત થયા છે, ખાસ કરીને લાસબેલા, કેચ, ક્વેટા, સિબી, ખુજદાર અને કોહલુમાં અચાનક પૂર આવી ગયું હતું.

ઉલ્લેખનીય છે કે પાકિસ્તાનમાં ચોમાસાની શરૂઆત થઈ ત્યારથી, દેશના ઘણા ભાગોમાં વરસાદ સંબંધિત ઘટનાઓએ વિનાશ વેર્યો છે. ભારે વરસાદને કારણે શહેરોમાં પાણી ભરાઈ ગયા છે અને સમગ્ર દેશમાં અચાનક પૂરની સ્થિતિ સર્જાઈ છે