બીબીસી ડોક્યુમેન્ટ્રી વિવાદ : સુપ્રીમ કોર્ટે કેન્દ્રને નોટીસ પાઠવી
ત્રણ સપ્તાહમાં જવાબ રજુ કરવાનો આદેશ : એપ્રિલમાં થશે સુનાવણી
નવી દિલ્હી તા. ૩ : ૨૦૦૨ના ગુજરાત રમખાણોને લગતી બીબીસી ડોક્યુમેન્ટ્રીનું સેન્સરિંગ રોકવા માટે કેન્દ્ર સરકારને નિર્દેશ આપવાની માંગ કરતી અરજી પર સુપ્રીમ કોર્ટે કેન્દ્રને નોટિસ જારી કરી હતી. સુપ્રીમ કોર્ટે કેન્દ્ર પાસેથી ત્રણ સપ્તાહમાં જવાબ માંગ્યો છે. આગામી સુનાવણી એપ્રિલમાં થશે. વરિષ્ઠ પત્રકાર એન રામ, ટીએમસી સાંસદ મહુઆ મોઇત્રા અને એડવોકેટ પ્રશાંત ભૂષણ તરફથી વરિષ્ઠ વકીલ સી.યુ. સિંહે સુપ્રીમ કોર્ટને જણાવ્યું હતું કે આ એક એવો કેસ છે જયાં જાહેર ડોમેનમાં આદેશો વિના કટોકટી સત્તાનો ઉપયોગ કરવામાં આવ્યો હતો. તેમણે માહિતી આપી હતી કે ડોક્યુમેન્ટ્રીની લિંક શેર કરતી ટ્વીટ્સને બ્લોક કરી દેવામાં આવી છે.
અગાઉ ૩૦ જાન્યુઆરીએ, સર્વોચ્ચ અદાલતે કહ્યું હતું કે તે વડા પ્રધાન નરેન્દ્ર મોદી અને ૨૦૦૨ના ગુજરાત રમખાણો પરની વિવાદાસ્પદ બીબીસી દસ્તાવેજી પર પ્રતિબંધ મૂકવાના કેન્દ્રના નિર્ણયને પડકારતી અરજીઓ પર પણ આગામી સુનાવણી કરશે.
કેન્દ્ર સરકારે ૨૧ જાન્યુઆરીએ BBCની વિવાદાસ્પદ ડોક્યુમેન્ટ્રી ‘ઈન્ડિયાઃ ધ મોદી ક્વેヘન' પર દેશમાં પ્રતિબંધ લગાવી દીધો હતો. જો કે, ઘણી શૈક્ષણિક સંસ્થાઓમાં વિદ્યાર્થી સંગઠનોએ ડોક્યુમેન્ટરીના સ્ક્રીનીંગને લઈને હોબાળો મચાવ્યો હતો, જેના કારણે વિવાદ થયો હતો.
કેન્દ્રીય કાયદા મંત્રીએ સુપ્રીમ કોર્ટમાં બીબીસી ડોક્યુમેન્ટ્રી પ્રતિબંધ વિરૂદ્ધ દાખલ કરાયેલી અરજીઓ પર આકરા ટિપ્પણી કરી હતી. તેમણે કહ્યું હતું કે આ રીતે આ લોકો માનનીય સુપ્રીમ કોર્ટનો કિંમતી સમય બગાડે છે જયાં હજારો સામાન્ય નાગરિકો ન્યાય માટે તારીખોની રાહ જોઈ રહ્યા છે. પત્રકાર એન રામ, એડવોકેટ પ્રશાંત ભૂષણ, ટીએમસી સાંસદ મહુઆ મોઇત્રા પણ આ મામલે સુપ્રીમ કોર્ટમાં ગયા છે.