કેરળના વરિષ્ઠ રાજકારણી અને પૂર્વ ધારાસભ્ય પી.સી. જયોર્જની દુષ્કર્મ કેસમાં ધરપકડ : પોલીસે ગેસ્ટ હાઉસમાંથી ઝડપી લીધા
- થાઇકૌડના ગેસ્ટ હાઉસમાં મહિલાનું શોષણ કરીને ખૂનની ધમકી આપી’તી
નવી દિલ્હી : કેરળનાં પૂર્વ ધારાસભ્ય પી.સી. જયોર્જની દુષ્કર્મ કેસમાં ધરપકડ થતા ખળભળાટ મચી ગયો છે.
મળતી વિગત મુજબ કેરળના વરિષ્ઠ રાજકારણી અને પૂર્વ ધારાસભ્ય પી.સી.જ્યોર્જની શનિવારે સોલાર પેનલ કેસના એક આરોપી દ્વારા દાખલ કરવામાં આવેલી જાતીય હુમલાની ફરિયાદના આધારે ધરપકડ કરવામાં આવી હતી. કેન્ટોનમેન્ટ પોલીસે એક ગેસ્ટ હાઉસમાંથી પી.સી.જ્યોર્જને કસ્ટડીમાં લીધા હતા. તેમના પર આઈપીસી કલમ 354 (એ) (જાતીય સતામણી) હેઠળ આરોપ મૂકવામાં આવ્યો છે.
મહિલાએ પોતાની ફરિયાદમાં આરોપ લગાવ્યો છે કે પીસી જ્યોર્જે તેને 10 ફેબ્રુઆરીએ થાઇકૌડના ગેસ્ટ હાઉસમાં આમંત્રિત કરી હતી, જ્યાં તેની સાથે યૌન શોષણ કરવામાં આવ્યું હતું. આ ઘટના બાદ, તેણીએ આરોપ લગાવ્યો હતો કે તેણીને જ્યોર્જ તરફથી ધમકીભર્યા મેસેજ પણ મળ્યાં હતા અને તેને મોં બંધ રાખવાની અથવા જાનથી મારી નાખવાની ધમકી આપી હતી.
કેરળ કોંગ્રેસના ભૂતપૂર્વ નેતા જ્યોર્જે રાજ્યમાં બિન-મુસ્લિમોને મુસ્લિમ સમુદાય દ્વારા સંચાલિત રેસ્ટોરાંથી દૂર રહેવાનું કહ્યું હતું, જેના કારણે વિવાદ સર્જાયો હતો. કેરળ વિધાનસભામાં 33 વર્ષ સુધી પૂંજાર બેઠકનું પ્રતિનિધિત્વ કરનારા 70 વર્ષીય જ્યોર્જે પણ બિન-મુસ્લિમોને મુસ્લિમો દ્વારા ચલાવવામાં આવતા વ્યવસાયોનો બહિષ્કાર કરવાની વિનંતી કરી હતી. રાજ્યમાં સત્તાધારી સીપીઆઇ(એમ) અને વિરોધ પક્ષ કોંગ્રેસે જ્યોર્જની ટિપ્પણીની નિંદા કરી હતી.