આ અનોખી લવ સ્ટોરી ચર્ચાનો વિષય બની છે

૪ બાળકોના પિતાને ૭ બાળકોની માતા સાથે થયો પ્રેમઃ હવે સાથે રહેવા તૈયાર!

મહિલાના મોટા દીકરાએ પોલીસ સ્ટેશનમાં ફરિયાદ નોંધાવી હતી કે તેની માતા ૧૫ હજાર રુપિયા લઈને ફરાર થઈ ગઈ છે

અમેઠી, તા.૩: અમેઠીમાં સાત બાળકોની માતા અને ચાર બાળકોના પિતા વચ્ચેની લવ સ્ટોરી સમગ્ર વિસ્તારમાં ચર્ચાનો વિષય બની છે. આ ઘટના અમેઠી જિલ્લાના જામો ક્ષેત્રના અજબગઢ વિસ્તારની છે. એવું કહેવામાં આવે છે કે આ ગામની જ રહેવાસી એક મહિલા પોતાના જ ગામના એક વ્યકિતને પ્રેમ કરે છે.

એવી ચર્ચા થઈ રહી છે કે જે પુરુષ સાથે તેને પ્રેમ હોવાનું ચર્ચાઈ રહ્યું છે તેના ચાર બાળકો છે તો મહિલા પણ સાત બાળકોની માતા છે. મહિલાના મોટા દીકરાએ પોલીસ સ્ટેશનમાં ફરિયાદ નોંધાવી હતી કે તેની માતા ૧૫ હજાર રુપિયા લઈને ફરાર થઈ ગઈ છે. ત્યારબાદ પોલીસે આ ફરિયાદ પર કાર્યવાહી કરવાનું શરુ કર્યું હતું.

આ ઘટનાની જાણકારી પછી તે સમયે મહિલાના પ્રેમીએ દંડ તરીકે આ રુપિયાની રકમ ભરપાઈ કરતા પોતાની પત્ની અને તે મહિલાને એક સાથે રહેવા માટે રાજી કરી હતી. સ્થાનીક લોકોનું કહેવું છે કે મહિલાએ પોતાના પ્રેમી સાથે રહેવાનો નિર્ણય કરી લીધો છે. આ અનોખી લવ સ્ટોરી આસપાસના વિસ્તારોમાં પણ ચર્ચાનો વિષય બની છે.